3 сентябрь куни Жиззах шаҳар ҳудудидан ўтувчи 4Р38 Учтепа—Жиззах—Бахмалсой автомобиль йўлида содир бўлган ЙТҲ оқибатида йўловчилардан бири вафот этди. Бу ҳақда ИИВ ЙҲХББ ахборот хизмати хабар берди.
Маълумотларга кўра, 29 ёшли Э.Ҳ. исмли ҳайдовчи Foton русумли юк автомобилини бошқариб кетаётиб, шу йўналишда, ўзидан олдинда, йўл четида тўхтаб турган ҳайдовчи, 1954 йилда туғилган Ш.П. бошқарувидаги «Камаз-53212» русумли юк автомобилининг тиркамасига урилиб, ЙТҲ содир этган.
Натижада, Foton русумли юк автомобили йўловчиси, 33 ёшли Ж.И. оғир тан жароҳатлари олиб шифохонада вафот этган. Ушбу юк автомобили йўловчиси, 30 ёшли К.И. тан жароҳатлари олиб шифохонага ётқизилган.
Мазкур ЙТҲ юзасидан Жиззах шаҳар ИИО ФМБ ҳузуридаги Тергов бўлими томонидан Жиноят кодексининг 266-моддаси 2-қисми (одам ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, ҳозирда тергов ҳаракатлари олиб борилмоқда.
Аввалроқ Жиззахда автобуснинг юк машинасига урилиши натижасида 2 киши ҳалок бўлгани, Сирдарёда Coca-Cola олиб кетаётган юк машинаси ағдарилиб кетгани тўғрисида хабар берилганди.
Изоҳ (0)