Хитой Фанлар академияси ва «Anhui ZhifeiLongcom Biopharmaceutical» компанияси томонидан ишлаб чиқарилаётган коронавирусга қарши вакцинанинг клиник синовлари учинчи босқичи Ўзбекистонда ҳам бўлиб ўтиши мумкин. Бу масала Ўзбекистон Инновацион ривожланиш вазирлиги, Соғлиқни сақлаш вазирлиги, Хитой Фанлар академияси, Халқаро фан ташкилотлари альянси ҳамда «Anhui ZhifeiLongcom Biopharmaceutical» компанияси вакиллари ўртасида бўлиб ўтган музокарада муҳокама қилинди.
Инновацион ривожланиш вазирлиги томонидан маълум қилинишича, йиғилишга Ўзбекистон томонидан инновацион ривожланиш вазири Иброҳим Абдураҳмонов ва Хитой томонидан Халқаро Фан ташкилотлари альянси ижрочи директори Чингуа Као раислик қилди.
Музокара давомида Хитой Фанлар академияси ва «Anhui ZhifeiLongcom Biopharmaceutical» компанияси томонидан ишлаб чиқарилаётган COVID-19’га қарши вакцина синовларини амалга оширишда ҳамкорликни олиб бориш масалалари муҳокама этилди.
Клиник синовлардан ўтказиш учун таклиф этилган янги вакцина рекомбинант оқсил технологиясига асосан коронавируснинг рецептор боғловчи оқсили домени бўлагини икки марта такрорлаш (димеризация) натижасида яратилган. Рецептор боғловчи домен барча турдаги короновирусларда ўхшаш бўлгани учун бу вакцина MERS, SARS ва COVID-19 вируслари учун универсал таъсирга эга. Бу вакцина Хитой Давлат фармакопиясининг талабларига қатъий мувофиқ ҳолда ишлаб чиқилган ва хавфсизликнинг юқори даражаси билан ажралиб туриши маълум қилинди. Янги вакцина олиш технологияси 2020 йил 6 августда нуфузли Cell журналида Хитойлик олимлар гуруҳи томонидан чоп этилган.
Таъкидланишича, ушбу вакцина клиник тадқиқотлар учун Хитой Миллий тиббиёт маҳсулотлари администрацияси томонидан 2020 йил 20 июнида тасдиқланган ва жаҳонда коронавирус инфекциясига қарши учинчи вакцина ҳисобланади.
Маълум қилинишича, одамлар ўртасида биринчи ва иккинчи фаза синов вакцинацияси муваффақиятли ўтказилган ва иккинчи фаза синовларининг якунланиши октябрь ойида бўлиши кутилмоқда. Янги вакцина учун клиник синовнинг учинчи фазаси 2020 йилнинг тўртинчи чорагида ўтказилиши режалаштирилмоқда.
Хитой томони клиник синовларнинг учинчи босқичи бир қатор мамлакатларда параллел равишда ўтказилиши режалаштирилганини айтиб, Ўзбекистонда ҳам кўнгиллилар ўртасида ушбу синов жараёнларини амалга ошириш имкониятларини ўрганиш истагида эканлигини билдирди. Шунингдек, вакцина синовларининг учинчи босқичини Узоқ Шарқ ва Араб мамлакатлари қаторида Ўзбекистонда ҳам ўтказиш эҳтимоли ҳақида ҳам сўз борди. Агар вакцина синовлардан муваффақиятли ўтса, синов натижалари асосида ушбу вакцинадан Ўзбекистон ва бошқа Марказий Осиё мамлакатларида фойдаланиш мумкинлиги қайд этилди.
Шу билан бирга, томонлар ўртасида синов ўтказиш бўйича молиявий харажатлар ва синов жараёнларининг муддатлари муҳокама этилди. Музокаралар натижаларига кўра, Ўзбекистон томонидан Соғлиқни сақлаш вазирлиги ҳузуридаги Вирусология илмий-тадқиқот институти ҳамда Инновацион ривожланиш вазирлиги ҳузуридаги Илғор технологиялар илмий-тадқиқот марказларида тест синовларини ўтказиш масалалари кўриб чиқилишига келишилди. Хитой томони учинчи босқич синовларини ўтказишда ҳам методик ҳам молиявий ёрдам кўрсатишга тайёр эканини билдирди. Учрашув сўнгида Ўзбекистон томонидан хитойлик ҳамкорларнинг таклифлари кўриб чиқилиб, якуний хулоса берилишига келишиб олинди.
Эслатиб ўтамиз, июль ойининг охирида Ўзбекистоннинг Хитойдаги элчиси Бахтиёр Саидов ва Sinopharm Group компанияси раҳбари Лю Сзинчжен билан бўлиб ўтган учрашувда клиник синовларнинг учинчи фазасини Ўзбекистонда ўтказиш масаласи кўтарилган. Sinopharm Group таркибидан Хитой миллий биотехника гуруҳи ўрин олган.
Изоҳ (0)