Туркиялик бир гуруҳ шифокорлар коронавирус инфекциясига қарши кураш борасида кўмаклашиш учун Наманганга келди. Бу ҳақда «Дарё» мухбири Азизбек Абдувалиев хабар бермоқда.
Меҳмонлар дастлаб вилоят юқумли касалликлар шифохонасида бўлди. Улар бу ерда вилоятдаги эпидемиологик вазият, коронавирус инфекциясига чалинган беморларни даволаш жараёнлари, аҳоли ўртасида олиб борилаётган тарғибот ишлари билан танишди. Шифохона бўлимларини кўздан кечириб, беморларга кўрсатилаётган тиббий хизмат ҳолатини ўрганди, улардан бир нечасини тиббий кўрикдан ўтказди.
«Коронавирус пандемияси жаҳон миқёсида хавф солиб турган пайтда тиббиёт соҳасидаги тажриба алмашинувлари муҳим аҳамиятга эга, — дейди Истанбул давлат шифохонаси педиатри доктор Юсуф Ўзкириш. — Бир неча кундан бери Ўзбекистон бўйлаб сафарда юрибмиз. Жойларда коронавирус инфекциясига қарши олиб борилаётган тизимли ишларни эътироф этиш жоиз. Туркияда ҳам бу касаллик жуда мураккаб вазиятни юзага келтирган эди. Карантин талабларига қатъий амал қилиниши туфайли унинг талафотларини камайтиришга эришяпмиз. Умид қиламизки, бу борада орттирилган тажриба Ўзбекистонда ҳам қўл келади».
Вилоят соғлиқни сақлаш бошқармаси матбуот хизматига кўра, туркиялик шифокорлар 4 кун мобайнида Намангандаги коронавирус инфекциясига чалинганлар даволанаётган тиббиёт муассасаларида ҳамкасблар ва беморлар билан мулоқотда бўлади. Бундан олдин россиялик 6 нафар мутахассис ҳам вилоятга келиб, ўз тажрибалари билан ўртоқлашганди.
Изоҳ (0)