Туркияда 2020 йилнинг иккинчи чорагида ялпи ички маҳсулот 9,9 фоизга пасайди. Бу 1998 йилдан бери қайд этилган рекорд даражадаги пасайиш ҳисобланади. Бу ҳақда Туркия статистика институти маълум қилди, деб ёзмоқда «Korrespondent.net».
Маълум қилинишича, 2020 йилнинг апрель—июнь ойларида коронавирус пандемияси фонида Туркия ЯИМ 9,9 фоизга пасайган.
«Иккинчи чоракда дунёнинг кўплаб давлатлари иқтисодиётининг қисқаришига олиб келган сўнгги юз йилликдаги энг талафоткор пандемиянинг оқибатларини ўзимизда сезишимизни билардик», — дея маълум қилган Туркия молия вазири Берат Албайрак.
Қайд этилишича, иқтисодчиларнинг иккинчи чоракда иқтисодий ривожланишнинг пасайиши бўйича прогнозлари 7-15 фоизни ташкил қилганди. Пандемия бошлангунига қадар Туркия иқтисодиёти 2020 йилда 5 фоизга ўсиши кутилаётганди.
Эслатиб ўтамиз, март ойида Goldman Sachs ва Morgan Stanley инвестиция банклари дунёда глобал инқироз бошланганини эълон қилганди. 2020 йилнинг 2-чорагида Канада ялпи ички маҳсулоти рекорд даражада — 38,7 фоизга қисқарди. Коронавирус пандемияси Европа иқтисодиётини 10-20 йил ортга сургани маълум қилинди.
Изоҳ (0)