Ўзбекистон мустақиллигининг 29 йиллиги арафасида Андижон шаҳрида Мудофаа вазирлиги ҳарбий хизматчилари учун узоқ муддатли имтиёзли ипотека кредити асосида қурилган икки ва уч хонали 90 хонадондан иборат 3 та кўп қаватли уй фойдаланишга топширилди. Бу ҳақда «Дарё»га вилоят ҳокимлиги ахборот хизмати хабар берди.
Янги хонадон калитларини топшириш маросимида Андижон вилояти ҳокими, ҳарбий-маъмурий сектор раҳбари Шуҳрат Абдураҳмонов, Мудофаа вазирининг қуролланиш ва қуроллантириш бўйича ўринбосари полковник Алишер Норбоев, Шарқий ҳарбий округ қўмондони полковник Лутфулла Бузруков иштирок этган.
Маълум бўлишича, лойиҳа қиймати 12 миллиард 240 миллион сўм бўлган ушбу замонавий уйлар Андижон шаҳридаги «Радиус-сервис», «Самандар шижоат», «Андижон қишлоқ қурилиш» масъулияти чекланган жамиятлари қурувчилари томонидан қисқа муддатда қуриб битказилган.
Янги уйларнинг кенг ва ёруғ хонадонларида яшовчилар учун зарур барча шарт-шароитлар яратилган. Шунингдек, алоҳида иситиш тизими, уйлар олдида болалар майдончаси барпо этилган.
Изоҳ (0)