Чироқчи туман тиббиёт бирлашмаси бош шифокори Тўлқин Ашуров вафот этди. Бу ҳақда Қашқадарё соғлиқни сақлаш бошқармаси ахборот хизмати маълум қилди.
Бош шифокор ўлими ҳақида хабар берган бошқарма ахборот хизмати марҳум нимадан вафот этганини очиқламаган.
«Дарё» мухбири билан суҳбатлашган Чироқчи туман тиббиёт бирлашмаси бош шифокори ўринбосари Одил Поёнов марҳум коронавирусдан даволанаётганини маълум қилди.
«Вилоят юқумли касалликлар шифохонасида коронавирусдан даволаниб келаётган эди. Бугун вафот этди», — деди марҳумнинг ҳамкасби Одил Поёнов.
Маълум бўлишича, марҳум Тўлқин Ашуров 51 ёш бўлган. У Қашқадарё вилоятининг Қамаши туманида таваллуд топган. 2017 йилдан буён Чироқчи тумани тиббиёт бирлашмаси бошлиғи лавозимида ишлаб келган.
Эслатиб ўтамиз, Қашқадарё соғлиқни сақлаш бошқармаси бошлиғи ўринбосари ҳам коронавирусдан вафот этганди. Марҳум бошқарма ҳузуридаги коронавирусга қарши курашиш штаби раҳбари эди.
Изоҳ (0)