Жиззахда 152 млн сўмлик тиббиёт воситалари, Сурхондарёда эса 2,5 минг дона психотроп таблеткаларнинг ноқонуний айланмасига чек қўйилди

Жиззах вилояти божхона бошқармаси Контрабандага қарши курашиш ва божхона аудити бўлими ходимлари томонидан ўтказилган тезкор тадбирда 152 миллион сўмлик тиббиёт воситаларининг ноқонуний савдосига чек қўйилди. Бу ҳақда Давлат божхона қўмитаси хабар берди.

Тезкор тадбирда фуқаро Р.Ҳ. ҳеч қандай ҳужжатларга эга бўлмаган, умумий қиймати 152 миллион сўмлик вирус блокаторлари ва бошқа тиббий воситаларни ноқонуний равишда сотмоқчи бўлган вақтида ашёвий далиллар билан қўлга олинган.

Шунингдек, Сурхондарё вилояти божхона бошқармаси «Сариосиё» чегара божхона постига қўшни мамлакатга чиқиш учун кириб келган фуқаро А.А. бошқарувидаги MAN русумли юк автотранспорт воситаси белгиланган тартибда кўздан кечирилганда машинадан психотроп таблеткалар аниқланган.

Автотранспорт воситасида олиб чиқишга рухсат берувчи ҳеч қандай ҳужжатлари бўлмаган ҳамда божхона ходимининг оғзаки сўровида маълум қилинмаган жами 2500 дона «Феназепам 1 мг» ва «Баклосан 25 мг» номли психотроп таблеткалар борлиги аниқланди.

Ушбу психотроп таблеткаларни Ўзбекистон ҳудудига олиб кириш, ундан олиб чиқиш ва транзит тарзида ўтказишга Вазирлар Маҳкамасининг 2015 йил 12 ноябрдаги 330-сонли қарори талаблари асосида махсус рухсатнома бўлган ҳолдагина рухсат этилади.

Бундан ташқари, Тошкент вилояти божхона бошқармаси Контрабандага қарши курашиш ва божхона аудити бўлими ходимлари гиёҳванд моддаларининг ноқонуний айланмасини фош этди.

Тошкент вилояти божхона бошқармаси Контрабандага қарши курашиш ва божхона аудити бўлими ходимлари Давлат хавфсизлик ходимлари билан ҳамкорликда гиёҳвандлик ва кучли таъсир қилувчи моддаларнинг ноқонуний айланмасига қарши тезкор тадбир ўтказди.

Тезкор тадбир давомида фуқаро Х.Т. ноқонуний тарзда 7 дона целлофан пакет парчаларига ўралган, ўзига хос, ўткир ҳидли, қовурилган наша гиёҳвандлик воситасини фуқаро К.А.га сотаётган вақтида ашёвий далиллар билан қўлга олинди.

Шунингдек, фуқаро Х.Т. бир дона целлофан пакет парчасига ўралган, қовурилган нашани тадбир иштирокчиларига тақдим қилган. Тезкор тадбир давом эттирилиб, фуқаро Х.Т.нинг вақтинча яшаш хонадони ҳам кўздан кечирилганда хонадонда наша барглари борлиги аниқланди.

Ўтказилган тадбир давомида 195 грамм қовурилган наша ва оғирлиги 10 граммни ташкил этувчи каннабис ўсимлиги барглари ашёвий далил сифатида олинди.

Ҳозирда юқоридаги ҳолатлар юзасидан божхона органлари томонидан терговга қадар текширув ҳаракатлари давом эттирилмоқда.