«Манчестер Юнайтед» 40 млн еврога «Аякс» ярим ҳимоячисини сотиб оладиган бўлди

«Аякс» ярим ҳимоячиси Донни ван де Бек фаолиятини «Манчестер Юнайтед»да давом эттиришга яқин турибди.

Журналист Фабрицио Романонинг хабар қилишича, томонлар 2025 йилга қадар мўлжалланган шартнома борасида келишиб олган.

30 август куни инглиз клуби «Аякс»га расмий таклиф билан чиққан. Амстердамликлар 23 ёшли футболчи трансфери борасидаги 40 миллион евролик таклифни савдолашмасдан қабул қилган.

Таъкидланишича, нидерландиялик футболчи яқин кунларда «Манчестер Юнайтед» футболчиси сифатида таништирилади.

Аввалроқ Донни «Аякс»даги шерикларига «Манчестер Юнайтед»га ўтаётгани ҳақида айтгани маълум бўлганди. Унга «Барселона»дан ҳам қизиқиш бор эди.

Ван де Бек коронавирус сабаб муддатидан аввал якунланган Нидерландия чемпионати 2019/20 йилги мавсумида 23 та ўйин ўтказиб, 8 гол ва 6 та голли узатма муаллифига айланди.