2020 йил 1 сентябрдан бошлаб Ўзбекистон фуқаролари турли чекловларсиз Қирғизистон ҳудудига кириши мумкин. Бу ҳақда Қирғизистон махсус штабига таяниб «24.kg» нашри хабар тарқатди.
Ўзбекистон Қирғизистон штаби томонидан тузилган COVID-19 бўйича эпидемиологик вазият барқарорлашган мамлакатлар рўйхатига киритилган. Шу сабабли энди ўзбекистонликлар Қирғизистон чегараларидан ўтиб, қўшни мамлакат ҳудудига кириши мумкин.
Аввал Қирғизистон мамлакат ҳудудига киришига рухсат берилган давлатлар рўйхати тузилганини маълум қилганди. Рўйхатга коронавирус инфекцияси билан касалланиш ҳолати бўйича эпидемиологик вазият ўнгланган, касалликка чалиниш кўрсаткичи пасайган давлатлар киритилган.
Шунингдек, ҳукумат хорижликлар ва фуқаролиги йўқ шахслар учун ҳам мамлакатга кириш тартибини соддалаштирган.
Аввал 2020 йил 31 август куни Қирғизистон пойтахтидаги Ала-Тов марказий майдонида президент Сўронбой Жээнбеков иштирокида Мустақиллик байрами муносабати билан тантанали байрам тадбири томошабинларсиз ўтказилиши хабар қилинганди.
Тожикистонда ҳам коронавирус инфекцияси сабабли Мустақиллик байрами муносабати билан ўтказиладиган анъанавий оммавий тадбирлар 2020 йилда ташкил қилинмайди.
Изоҳ (0)