Туркиялик инсон ҳуқуқлари фаоли Эбру Тимтик 238 кунлик очлик эълонидан сўнг вафот этди. Полиция унинг дафн маросимида қатнашганларни тарқатиб юборган

Туркиялик инсон ҳуқуқлари ҳимоячиси, адвокат Эбру Тимтик 27 август куни унинг иши адолатли кўриб чиқилишини талаб қилиб, очлик эълонидан сўнг 238 кун ўтиб, 42 ёшида вафот этди. Бу ҳақда унинг адвокати Фаусто Жанеллига таяниб, Meduza хабар қилди.

Эбру Тимтик террористик гуруҳ тузиш ва бошқариш айблови билан қамалган. У 2018 йил сентябрь ойида ҳибсга олинган, шундан кейин у 13 ярим йилга озодликдан маҳрум қилинган. Умуман олганда, ушбу иш бўйича 18 адвокат қамоқ жазосига ҳукм қилинган. Улар Туркияда тақиқланган Инқилобий Халқ озодлик фронти партияси билан алоқада бўлганликда айбланган.

Адвокат Наим Эминўғлининг AFP’га айтишича, Тимтик «одамларни турли вазиятларда ҳимоя қилгани» учун суд қилинган. 301 кишининг умрига зомин бўлган Сома конидаги портлаш воқеаси шулар жумласидан.

2020 йил февраль ойида Эбру Тимтик ва унинг ҳамкасби Айтаж Унсал очлик эълон қилди ва июль ойида у қамоқдан касалхонага кўчирилган. 14 август куни кассация суди унинг суд ҳукми устидан шикоятини рад этди. Унинг ўлимидан олдин Эбру Тимтикнинг вазни 30 килограммгача тушиб кетган.

Эбру Тимтикни дафн этиш маросими 28 август куни бўлиб ўтди. Полиция Истанбулнинг шимолидаги қабристонда адвокат билан хайрлашиш учун келган юзлаб одамларни тарқатиб юборди, деб хабар берди AFP. Намойишчилар «Эбру Тимтик ўлмас!» ва «Қонхўр давлат жавобгарликка тортилади!» деб бақирган.

Европа Кенгашининг Инсон ҳуқуқлари бўйича комиссари Дуня Миятович Эбру Тимтикнинг вафотидан чуқур қайғудалигини айтган.

«Унинг ўлими адвокатлар, ҳуқуқ ҳимоячилари ва журналистларни жим қилиш учун ишлатилган суд тизимининг қайғули оқибатларини намойиш этади», – деди Миятович.

Европа Иттифоқи Туркия расмийларини мамлакатда инсон ҳуқуқларини бузаётганликда танқид қилди. Европа ташқи хизматининг билдиришича, Тимтик бу йил Туркияда узоқ давом этган очлик эълонлари туфайли вафот этган тўртинчи маҳбус.

Бундан олдин курдларнинг Grup Yorum гуруҳи аъзолари Хелин Бўлек ва Иброҳим Гўкчек ҳамда сиёсий маҳбус Мустафо Кочак вафот этган эди.

«Уларнинг адолатли суд учун олиб борган курашларининг фожиали натижалари Туркия ҳукуматига мамлакатда сўнгги йилларда кескин ёмонлашган инсон ҳуқуқлари билан боғлиқ вазиятни, шунингдек, суд тизимида кузатилган жиддий камчиликларни ишончли тарзда тузатиш зарурлигини оғриқли тарзда намойиш этади», – дейилади Европа Иттифоқи баёнотида.