Дунё бўйича COVID-19 коронавирус инфекциясини юқтириб олганлар сони 25 млн нафардан ошди
Бутун дунёда COVID-19 коронавирус инфекциясига чалинганлар сони 25 миллион нафардан ошди. Бу ҳақда коронавирус пандемияси ҳақидаги статистик маълумотларни эълон қилиб бораётган Жонс Ҳопкинс университетининг ахборотида қайд этилган.
2020 йил 30 август Тошкент вақтида билан соат 19:30 ҳолатига кўра, Ер юзида коронавирус билан касалланганлар сони 25 042 382 нафарга етган. COVID-19 инфекцияси оқибатида вафот этганлар сони эса 843 минг нафардан ошган.
Ҳали ҳам коронавирус билан касалланганлар сони бўйича бутун дунёда АҚШ етакчилик қилмоқда, мамлакатда қарийб 6 миллион нафар одам касалликка чалинган. Иккинчи ўринни Бразилия (3 846 153 нафар), учинчи поғонани эса Ҳиндистон (3 542 733 нафар) эгаллаб турибди. Тўртинчи ўриндан Россия (987 470 нафар) ва бешинчи ўриндан эса Перу (639 435 нафар) жой олган.
Касаллик оқибатида қайд этилган ўлимлар сони бўйича энг ёмон кўрсаткич ҳам АҚШга тегишли: мамлакатда 182 786 нафар бемор инфекция асоратлари оқибатида вафот этган. Кейинги ўринларда Бразилия (120 262), Мексика (63 819), Ҳиндистон (63 498), Буюк Британия (41 585), Италия (35 473) ва Франция (30 607) бормоқда.
Эслатиб ўтамиз, дунёда коронавирусга чалинганлар сони 3 август куни 18 миллионга, 7 август куни 19 миллионга, 10 августда 20 миллионга етган, 15 август куни эса 21 миллиондан, 19 август куни эса 22 миллиондан ошганди. 22 августда бу кўрсаткич 23 миллионга етган. 27 августда эса бутун дунё бўйлаб коронавирус инфекцияси билан касалланганлар сони 24 миллиондан ошганди.
