Дунёга машҳур кўча рассоми Бэнкси Шимолий Африкадан Ўрта Ер денгизи орқали Европага бошпана илинжида келаётган қочоқлар учун кема харид қилди, деб ёзади The Guardian.
Кема XIX асрдаги франциялик анархист Луиза Мишель шарафига номланган бўлиб, уни ҳозирда қутқарув операциялари билан шуғулланаётган тўққиз кишидан иборат жамоа бошқармоқда. Кема капитани — денгиздаги инсонларни қутқариш борасидаги таржибага эга Пиа Клемп.
Клемпнинг айтишича, у билан Бэнксининг шахсан ўзи боғланган. Бэнкси унга мактуб ёзиб, қочоқлар муаммоси ортидан бироз пул ишлаб топгани ва уни ўзида қолдира олмаслигини билдирган. Шу сабабли у бу пулларни инсонларга ёрдам беришга йўналтиришни истаган.
«Луиза Мишель» 18 август куни Испаниянинг Бурриана портида денгизга чиққан ва 89 нафар қочоққа ёрдам кўрсатган (жумладан 14 нафар аёл ва тўрт нафар бола). Эндиликда экипаж уларни тушириш мумкин бўлган портни қидирмоқда. Бироқ уларга Ливия қирғоқ қўриқчилари етиб олиши ва қочоқларни Ливиядаги махсус лагерга олиб кетиш хавфи мавжуд.
Кема ёрқин пушти рангга бўялган бўлиб, у Бэнксининг сурати билан безатилган. Унда юрак шаклидаги қутқарув айланасини ушлаб турган қизалоқ тасвирланган. Бунга қадар 31 метрли яхта француз божхона хизматига тегишли бўлган.
2020 йилда Ливияга 7600 дан ортиқ қочоқ қайтарилган, 19,5 мингдан ортиғи эса Европага қайтиб кетган. Ўрта Ер денгизини кесиб ўтишда камида 500 киши ҳалок бўлган.
Изоҳ (0)