Hozirgi kunning eng sirli rassomi Benksi Instagram’dagi sahifasida qora tanli Jorj Floydning o‘limi munosabati bilan AQShdagi norozilik namoyishlari mavzusiga bag‘ishlangan asarini e’lon qildi.
Kartinada motamsaro portret aks etgan bo‘lib, unda yuzi ko‘rinmagan qora tanli insonning siymosini ko‘rish mumkin. Portret atrofiga gullar va shamlar qo‘yilgan bo‘lib, shamlardan biri yonib turibdi.
https://www.instagram.com/p/CBFyA8iM15Y/
Kartina izohiga Benksi dastlab bu mavzuda gapirmay jim turib, qora tanlilar fikrini tinglamoqchi bo‘lganini yozib qoldirdi.
“Biroq keyin bu ularning emas, mening muammom ekanligini tushundim”, — deb yozadi rassom.
“Rangli odamlar tizimdan aziyat chekadi. Oq tizimdan. Sozlanmagan trubadek ular pastki qavatdagi insonlar uyini suvga to‘ldiradi. Bu zararli tizim ularni aziyat chekishga majburlaydi. Biroq uni tuzatish ularning vazifasi emas.
Ular tuzata olmaydi ham, ularni hech kim uyiga kirgizmaydi ham”, — deydi Benksi.
Rassom oq tanlilar ushbu muammoni hal qilishi kerakligi haqida ogohlantirdi.
“Aks holda kimdir yuqori qavatga ko‘tarilib, eshikni buzib kirishga majbur bo‘ladi”, — deb yozadi Benksi.
