Қашқадарёда «Камаз» ва Damas иштирокидаги ЙТҲда икки киши ҳалок бўлди, яна икки нафари тан жароҳати билан шифохонага ётқизилди. Бу ҳақда ЙҲХББ матбуот хизмати хабар берди.
Воқеа 28 август куни соат 15:15 ларда, Қашқадарё вилояти, Косон тумани ҳудудидан ўтган 4К-339 «Қарши айланма йўлининг» 6-километрида юз берган.
20 ёшли ҳайдовчи Н.Ш. Damas’ни Обдида—Хўжақўрғон кўчалари кесишган чорраҳада иккинчи даражали йўлдан ҳайдаб келиб, асосий йўлдан ҳаракатланиб келган 29 ёшли ҳайдовчи Б.У. бошқарувидаги «Камаз-5320» русумли юк автомобилини ўтказиб юбормасдан, ўнг томон олди қисмига бориб урилиб, ЙТҲ содир этган.
Оқибатда Damas ҳайдовчиси воқеа жойида, ундаги 18 ёшли йўловчи А.Ж. шифохонада вафот этган. «Камаз» ҳайдовчиси ва 18 ёшли йўловчиси А.О. тан жароҳати олиб шифохонага ётқизилган.
Ҳолат юзасидан Косон тумани ИИБ ҳузуридаги ТБ томонидан ҳодиса содир бўлган куни Жиноят кодексининг 266-моддаси 3-қисми «а» банди (одамлар ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Ҳозирда тергов ҳаракатлари олиб борилмоқда.
Изоҳ (0)