24—27 август кунлари Тошкент шаҳрида ўзбек—қирғиз давлат чегарасини делимитация ва демаркация қилиш масалалари бўйича Ўзбекистон ва Қирғизистон ҳукуматлари делегацияларининг навбатдаги йиғилиши ҳамда ишчи гуруҳларининг учрашувлари бўлиб ўтди, деб хабар беради ЎзА.
Аввалроқ 26 август куни Вазирлар Маҳкамасида ўтган учрашувда Ўзбекистон ва Қирғизистон ўртасидаги кўп асрлик дўстлик ва яхши қўшничилик муносабатлари изчил кенгайиб, мустаҳкамланиб бораётгани қайд этилган. Савдо-иқтисодий, транспорт-коммуникация ва маданий-гуманитар ҳамкорликни ривожлантириш, сув ресурсларидан оқилона фойдаланиш масалалари кўриб чиқилган эди.
Мазкур учрашув чоғида Қирғизистон бош вазири ўринбосари – делегация раҳбари Акрам Мадумаров пандемия даврида Ўзбекистон раҳбариятининг қирғиз халқига кўрсатган инсонпарварлик ёрдамлари учун Қирғизистон раҳбарияти номидан самимий миннатдорлик билдирган.
Ҳукуматлар делегацияларининг 27 август куни бўлиб ўтган якуний музокаралари доирасида томонлар 2017—2020 йилларда икки мамлакат ишчи гуруҳлари томонидан ишлаб чиқилган давлат чегарасининг айрим нуқталарини белгилаш лойиҳасини тасдиқлаш ҳақида келишувга эришилди. Шунингдек, Ўзбекистон ва Қирғизистон чегарасида айрим ўтказиш пунктларини очиш масаласи ҳам муҳокама қилинган.
Дўстлик ва яқин қўшничилик руҳида ўтган музокаралар якунида тегишли битимлар имзоланган.
Эслатиб ўтамиз, 22 августда Қирғизистон 31 та давлат фуқароларига ўз чегараларини очган, бироқ рўйхатга Ўзбекистон киритилмаган.
Маълумот учун, 31 май куни Ўзбекистоннинг Сўх тумани Чашма қишлоғи ва Қирғизистоннинг Қадамжой тумани Чечме қишлоғи аҳолиси ўртасида Қирғизистон ҳудудида жойлашган, сувидан Ўзбекистон ҳам фойдаланадиган Чашма булоғи устида баҳс чиқиб, катта можарога айланиб кетган. Сўх тумани ҳокимлиги маълумотларига кўра, ҳодиса оқибатида 187 нафар ўзбекистонлик тан жароҳати олган, Ўзбекистон ҳудудидаги учта хонадонда ёнғин чиққан. Қирғизистоннинг Боткен вилоятида уй ва омборхона ёниб кетган.Ушбу ҳолат юзасидан 1 июнь куни Ўзбекистон бош вазири Абдулла Арипов Ўзбекистон—Қирғизистон чегарасида қўшни мамлакат ҳукумати раҳбари билан учрашди. Бундан ташқари, Президент Шавкат Мирзиёев Қирғизистон президенти Сўронбой Жээнбеков билан телефон орқали мулоқот қилди.
Изоҳ (0)