27 август куни Ўзбекистон Мустақиллигининг 29 йиллиги арафасида Қорақалпоғистоннинг Нукус шаҳрида Мудофаа вазирлиги ҳарбий хизматчилари учун узоқ муддатли имтиёзли ипотека кредити асосида қурилган 2 та кўп қаватли турар жой биноси фойдаланишга топширилди. Бу ҳақда Шимоли-ғарбий ҳарбий округ матбуот хизмати «Дарё»га маълум қилди.
Янги хонадон калитларини топшириш маросимида Қорақалпоғистон Вазирлар Кенгаши раисининг ўринбосари Женгисбай Ембергенов, Шимоли-ғарбий ҳарбий округ қўшинлари қўмондони Фарҳоджон Шерматов, Нукус гарнизони ҳарбий прокуратураси раҳбарияти, ҳарбий хизматчилар оилалари ҳамда жамоатчилик вакиллари иштирок этган.
Тадбир давомида охирги 3 йилда Шимоли-ғарбий ҳарбий округда 300 нафардан зиёд ҳарбий хизматчилар учун имтиёзли ипотека кредити асосида 8 та уй қурилгани таъкидланди.
Ахборотда қайд этилишича, Нукус гарнизонидаги «Ватанпарвар» маҳалласида бунёд этилган иккита 5 қаватли уйда 30 та хонадон мавжуд.
Шунингдек, хабарда Шимоли-ғарбий ҳарбий округ қўшинлари қўмондонлиги ва Қорақалпоғистон билан ҳамкорликда Мудофаа ишлари бошқармасининг янги биносини қуриш, «Нукус» полигони инфратузилмасини такомиллаштириш борасида ишлар давом эттирилаётгани айтилган.
Тадбир давомида янги хонадон эгаларига калитлар тантанали тарзда топширилди. Меҳмонлар янги хонадонларга эга бўлган ҳарбий хизматчилар уйларига кириб, уларга оилавий бахт ва омад тилади, дейилади Шимоли-ғарбий ҳарбий округ матбуот хизмати хабарида.
Изоҳ (0)