Ўзбекистон Давлат божхона қўмитаси россиялик блогер Илья Варламовнинг Ўзбекистонга ўтиш чоғида божхоначиларнинг ножўя хатти-ҳаракатлари ҳақида сўзлаб берган видеоси юзасидан баёнот берди.
Варламов 25 август куни ижтимоий тармоқларда эълон қилган видеоинтервьюсида Қозоғистондан Ўзбекистонга ўтиш чоғида божхоначиларнинг ножўя хатти-ҳаракатлари, сигаретларини олиб қўйганлиги ҳақида сўзлаб берган.
Ўрганишлар натижасида маълум бўлишича, блогер Илья Варламов сўнгги 5 йилда Ўзбекистон—Қозоғистон чегарасидаги автомобиль ўтказиш пунктлари орқали умуман ҳаракатланмаган, фақатгина 2020 йил 9 февраль куни тонгги соат 05:10 да Россиядан тўғридан-тўғри Самарқанд аэропортига учиб келган ва 10 февраль куни мазкур вилоятдаги «Жартепа» чегара божхона пости орқали Тожикистонга чиқиб кетган.
«Жартепа» чегара божхона постида ҳам ушбу шахс соддалаштирилган тартибда ва тезкорлик билан божхона назоратидан ўтказилган.
Таъкидланишича, Самарқанд халқаро аэропорти ва «Жартепа» чегара божхона постларида хизмат олиб бораётган ходимлар билан ушбу шахс ўртасида ҳеч қандай тушунмовчиликлар келиб чиқмаган.
«Бугунги кунда барча чегара божхона постлари замонавий сканер қурилмалари билан таъминланган бўлиб, фуқаролар томонидан олиб ўтилаётган қўл юклари ва багажлар тезкорлик билан ва амалдаги норматив-ҳуқуқий ҳужжатлар талаблари доирасида божхона назоратидан ўтказилмоқда. Шунингдек, юртимизга ташриф буюрган хорижий сайёҳлар учун чегара божхона постларида алоҳида йўлаклар ҳам ташкил этилган», — дейилади қўмита баёнотида.
Варламовнинг блогидан кўриш мумкинки, блогер 2010 йилнинг апрелида «Йўл қайдлари. Учинчи кун, биз қандай қилиб Ўзбекистонга етиб олдик?» сарлавҳаси остида пост эълон қилган. Блогер унда Қозоғистондан Ўзбекистонга чегарадан қандай қилиб ўтгани, Ўзбекистон чегара постлари 8 соатгина ишлаши, чегарадан ўтаётганда барча техникалар ва пулларни декларацияга киритиш лозимлиги ҳақида ёзган. Шунингдек, у ўзбекистонлик чегарачилар фотоаппаратининг флеш-хотирасидаги суратларни текширганини ҳам қайд этиб ўтган.
Изоҳ (0)