Коронавирусга қарши кураш штаби аъзоси Ҳабибулло Оқилов гриппдан мавсумий вакцина олиш ҳозирги вазиятда қанчалик тўғри эканлиги борасидаги саволга аниқлик киритди.
Жумладан, аҳолидан келиб тушган «Ҳар кузда биз оиламиз билан гриппдан эмланар эдик. Бу йил ҳам олсак бўладими ва бу хавфли эмасми?», деган саволга профессор Оқилов қуйидагича жавоб берган:
«Гриппга қарши мавсумий эмланишнинг коронавирусга ҳеч қандай алоқаси йўқ ва агар ўтказилиш вақтида бирор қўллашга қарши кўрсатмалар бўлмаса, одатий тартибда қилиниши мумкин».
Эслатиб ўтамиз, Врачлар малакасини ошириш институти доценти Дилфуза Ҳасанова бемор грипп билан коронавирусни юқтириб олган бўлса, касаллик оғир кечиши, гриппда иммунитет паст бўлса, касаллик ўтиб кетадиган бўлса, грипп чақирадиган пневмонияга олиб келиши мумкинлиги, бунда ўпканинг юқори қисмлари зарарланишини айтган эди. Шунингдек, Ўзбекистонда умумий ўрта таълим муассасалари ходимлари 1 октябрга қадар гриппга қарши эмланиши маълум қилинган.
Аввалроқ Ўзбекистон Соғлиқни сақлаш вазирлиги ҳузуридаги Коронавирусга қарши курашиш штаби аъзоси, эпидемиолог Рустам Икромов аҳолини грипп ва пневмонияга қарши эмлаш бўйича чора-тадбирлар режаси ҳукуматга тақдим этилгани, агар режа тасдиқланса, сентябрь ойидан эмлаш ишлари бошланишини билдирган эди.
Бундан ташқари, Юнусобод туманидаги 50-оилавий поликлиника бош шифокори Шоира Абдусатторова «туман ҳокими раҳбарлигида ўтказилган йиғилишда туман аҳолисининг камида 70 фоизини гриппга қарши оммавий эмлашга келишиб олингани»ни маълум қилган эди. Унинг айтишича, 2018 ва 2019 йилларда Юнусободда аҳолининг фақат бир фоизи гриппга қарши эмланган.
Изоҳ (0)