Россиянинг Шимолий Кавказ ва Жанубий федерал округларидан 927 нафар ўзбекистонлик поезд орқали мамлакатга олиб келинди. Бу ҳақда Транспорт вазирлиги ахборот хизмати хабар берди.
Республика махсус комиссияси Ўзбекистон фуқароларини Россиянинг Шимолий Кавказ ва Жанубий федерал округларидан олиб келиш учун Тошкент–Ростов-Дон–Тошкент темир йўл рейсини ташкил этиш тўғрисида қарор қабул қилганди.
Россия ва Қозоғистон томони билан келишувга биноан, 23 август куни «Ўзбекистон темир йўллари» АЖ поезди 927 нафар фуқаро билан «Первомайская» станциясидан Ўзбекистонга жўнаган. Мазкур поезд 27 август куни Наманган вилоятига етиб келди.
Қайд этилишича, ушбу рейс орқали олиб келинган барча фуқаролар вилоят транспорт бошқармаси томонидан ташкил этилган автобусларда карантин зоналарига етказилган.
Аввал ҳам Республика махсус комиссияси қарорига асосан Россиянинг Шимолий Кавказ ва Жанубий федерал округларидаги ўзбекистонликларни олиб келиш учун Тошкент—Ростов-Дон—Тошкент йўналиши бўйича темир йўл рейси ташкил қилинган. 10 август куни Гниловская—Тошкент йўналишида ҳаракатланишни бошлаган поезд 13 август куни 918 нафар фуқарони Ўзбекистонга олиб келган.
9 августда Россиядан поездда олиб келинган 918 нафар ўзбекистонлик Намангандаги карантин зонасига жойлаштирилган. Шунингдек, шу куни бошқа бир поезд Самарадан Самарқандга ўзбекистонликларни олиб келган.
Изоҳ (0)