«Уйда ёлғиз» комедияси Америка кино ижодкорлари томонидан 1990 йилда суратга олинган. Фильм АҚШ кино тарихидаги энг кўп даромад келтирган комедияга айланди.
Машҳур фильмнинг премьерасига 30 йил тўлган бўлса, комедиянинг бошқа қаҳрамони кичкина Кевин Маккаллистер ролини ижро этган Маколей Калкин 26 август куни 40 ёшни қарши олди. Машҳурлик ва шон-шуҳратни жуда эрта ҳис этган боланинг тақдири қандай кечгани ҳақида сўз юритамиз.
Оилавий муаммолар
«Уйда ёлғиз» фильмининг дастлабки икки қисми актёрнинг бошини айлантирадиган даражада муваффақият ва катта даромадни туҳфа этди. Аммо 10 яшар юлдуз бахтли ва беташвиш болаликни орзу қиларди.
Маколейнинг отаси Кристофер Калкин фарзандини турли кино синовларга мажбуран олиб борар, унга роль танлар ва таниқли ўғли суратга тушиши учун тасаввур қилиб бўлмас даражада катта гонорарни талаб этарди. Саводсиз ва очкўз ота туфайли Маколей саёз фильмларда ҳам суратга туша бошлади.
1995 йил йил Маколей «Энг ёмон эркак роли» ижрочиси деб топилди ва шундан сўнг унинг карьерасига каттагина нуқта қўйилди.
Қизиқарли факт: 1995 йил Маколей Калкин тарихда бринчи бўлиб энг кўп маош оладиган болалар актёрига айланди, у «Уйда ёлғиз» фильми учун 4,5 миллион доллар олган.
Буни тан олиш қанчалик қийин бўлмасин, ёқимтой болакайнинг ҳаёти тамоман ачинарли томонга қараб кетди. Актёрлик фаолияти якунланган Маколей дастлаб бунга ачинмади, аммо унинг хатти-ҳаракатлари орқали ичини қандай дард кемираётганини билиш қийин эмасди.
Актёр 17 ёшида америкалик актриса Рэйчел Майнерга уйланди. Табиийки, уларнинг оиласи узоқ вақт яшамади, жуфтлик икки йилдан сўнг ажрашишга қарор қилди. Шунингдек, юлдузнинг ёш актриса Мила Кунис билан ўрнатилган муносабати ҳам 9 йил давом этди.
Қизиқарли факт: Маколей Калкин 2013 йил The Pizza Underground номли мусиқий гуруҳ ташкил этди ва рэпертуардаги барча қўшиқлар актёрнинг севимли егулиги пиццага бағишланган эди.
Бир неча жиддий муносабатларнинг муваффақиятсизликка учраши ҳамда оилавий муаммолар актёрни чуқур тушкунликка туширди. Бундай қийин вазиятда актёр ноқонуний моддалар билан ўралашиб қолди. Илгари у вақти-вақти билан кичик эпизод ролларга таклиф қилинар ёки телешоуларда суратга тушар эди, гиёҳвандлик моддалари сабаб иш берувчиларнинг омадсиз йигитга талаби сусайди.
Ҳаётга қайтиш, янги исм ва янги муҳаббат
Ҳаётдаги турли қийинчиликлар, муаммолар, буларнинг барчасини тугатиш учун «Уйда ёлғиз» фильми юлдузи ўзини қўлга олиш учун жиддий киришди. 2018 йил актёр ижтимоий тармоқларда анча фаоллашди ва дунё бўйлаб ўз мухлислари билан мулоқот қила бошлади.
Айнан мухлислари унга керакли инсон эканлигини ҳис қилишига ёрдам берди. Актёр Twitter ва Instagram саҳифалари орқали мухлислари билан тез-тез фикр алмашиб, ҳатто исмини ўзгатирмоқчи эканлиги ҳақида ҳам айтиб ўтди. Берилган овозлар натижасига кўра, актёр мухлислари уни Маколей Калкин сифатида яхши кўришини ва ҳаммасини қайтадан бошлашга имкон борлигини англаб етди.
Маколейнинг ҳаётида ҳам қуёш нур соча бошлади, у 2017 йилдан буён мафтункор актриса ва модель Бренда Сонг билан учрашяпти. Энди эса барча «Уйда ёлғиз» қолган Маколей томошабинларни ҳайратга солишни бас қилиб, уларнинг муҳаббатини қайтаришини кутмоқда.
Изоҳ (0)