Ўзбекистон маданият вазири Озодбек Назарбеков 25 август, сешанба куни вафот этган таниқли актриса Дилбар Икромованинг ўлимига коронавирус сабаб бўлганини маълум қилди.
Инсоният яралибдики, шодлигу қайғуни енгиб ўтишга мажбур. Энг улуғ, энг азиз байрамимиз арафасидаги кўтаринкилик ўрнини яна қайғу эгаллади. Санъатимизнинг ёрқин юлдузларидан бири, Ўзбекистон халқ артисти Дилбар Икромова машъум коронавирус касаллигидан вафот этди. Бир ой давомида оғир дард билан курашган, ҳаётдан умидини узмаган матонатли аёл шифокорларнинг астойдил ҳаракатларига қарамай ёруғ олам билан видолашди.Дилбар Икромованинг ўлимига коронавирус сабаб бўлгани ҳақида Соғлиқни сақлаш вазирлиги ҳозирча хабар бермади. «Дарё» ҳисобига кўра, Дилбар Икромова Ўзбекистонда коронавирус асоратларидан вафот этган 294-бемор бўлди.73 ёшли ёшли Дилбар Икромова кино ва театр актрисаси сифатида баракали ижод қилди. Унинг ҳаётида, ижодий фаолиятида катта воқеа бўлган ‘Келинлар қўзғолони’даги Сотти образи мухлислар қалбидан чуқур жой олган эди. ‘Чимилдиқ’ спектакли ва бадиий фильмидаги момо образи эса ижодининг чўққиси бўлди дейиш мумкин. ‘Ўзбекча рақс’даги қайнона-она образи билан эса барча онахонлар, хотин-қизлар эҳтиромига сазовор бўлди. Дилбар Икромова ўзига топширилган ролларни бутун вужуди билан ижро этадиган оташин қалбли санъаткор эди.
Актрисанинг 40 дан ортиқ фильмлардаги, қатор-қатор саҳна асарларидаги роллари халқимиз севиб томоша қиладиган образларга айланган эди. Тиниб-тинчимас ижодкорнинг ҳали ўйналмаган роллари ҳам кўп эди. Севимли актрисамиз энди ана шу элимиз ёқтирган, ардоқлаган ижодида, ролларида мангу яшайди.
Ўзбекистон маданият вазирлиги етук санъаткор, Ўзбекистон халқ артисти Дилбар Икромованинг вафоти муносабати билан унинг оила аъзолари ва яқинларига, ҳамкасбларига чуқур таъзия изҳор этади.
Озодбек Назарбеков, Ўзбекистон маданият вазири
Изоҳ (0)