Рус киноижодкорлари томонидан суратга олинган «Ишбилармон кишилар» тақдим этилганига 58 йил бўлганига қарамай, ҳалигача у томошабинларнинг севимли фильми ҳисобланади. Фильмда бола ўғирлаб, унинг отасидан пул талаб қилган икки фирибгарнинг «доди»ни берган шумтакани гавдалантирган актёр Сергей Тихоновнинг тақдири қандай кечгани кўпчиликка қизиқ.
Сергей Тихонов Леонид Гайдайнинг «Ишбилармон кишилар» фильм-трилогиясидаги «Ҳиндулар саркардаси» қиссасида Жонни Дорсет роли билан машҳурликка эришди. Ёш актёр Сергей режиссёр Евгений Шерстобитов томонидан безори бола ролига таклиф қилинган. Евгенийнинг ўзи эса у ҳақида: «Бу боланинг ноёб актёрлик истеъдодини кўриш учун, албатта, режиссёр бўлиш шарт эмас», — деб айтган.
1967 йил Сергей яна бир машҳур «Дубровкада» картинасида суратга тушди. Шунинг билан актёрнинг кино соҳасидаги фаолияти якун топади.
Тихонов «Дубровкада» фильмида ижро этган Вовки Утюг ролидан кейин Кинематография институти (ВГИК)га ўқишга топширади, афсуски, у ўқишга қабул қилинмайди. Шундан сўнг у совет армиясига хизматга юборилади. Ҳарбийдан қайтган Сергейнинг ҳаёти ҳақида эса бошқа нарса маълум эмас.
1972 йил 21 апрелда актёр трамвай уриб юбориши оқибатида вафот этган.
«Ишбилармон кишилар» фильми ҳанузгача севиб томоша қилинади. Фильмга кўра, Сем (Георгий Вицин) ва Билл (Алексей Смирнов) фирибгарлик ишини амалга ошириши учун 2 минг доллар маблағ етмас эди. Улар шаҳар аҳолисининг таниқли кишиларидан бири Эбенезер Дорсетнинг кичик ўғлини ўғирлаб, эвазига ўзларига керакли миқдордаги пулни талаб этмоқчи бўлади. Режа бажарилади, болани ўғирлаб, ўрмондаги ғорга яширинади ва шумтака болакайнинг отаси Дорсетга ўғрилик ва тўлов ҳақида мактуб ёзилади.
Аммо тўполончи болакай шу даражада безориликлар қиладики, қароқчилар нафақат тўловни рад этишга, балки «асир»дан қутулиш учун ўзларининг бор пулини беришга ҳам мажбур бўлади. Сўнгра уддабурон отадан фарзандини атиги 10 дақиқа ушлаб тура олиши хабарини эшитиб, «Биз унгача Канада чегарасига етиб оламиз», дея икковлон жуфтакни ростлайди.
Изоҳ (0)