2009 йилда эфирга узатилган ҳамда томошабинлар меҳрини қозонган «Туташ тақдирлар» сериали режиссёри Замира Бегимқулова ҳамда бош роллар ижрочилари Жаъфар Мўминов ва Нилуфар Ҳамидова MY5 телеканалининг «Омон-омон» кўрсатувида меҳмон бўлди.
Маълум бўлишича, сериал ижодкорлари ўтган вақт ичида бирон марта ҳам бирга йиғилмаган. Сериалдаги Азизбек ролини гавдалантирган актёр Жаъфар Мўминов ҳозирда АҚШда яшайди.
«Жаъфар билан ‘Гулхан атрофида’, ‘Туташ тақдирлар’ ва ‘Опа-сингиллар’ сериалларида бирга ишладик. Аммо ‘Опа-сингиллар’ охирига етмасдан, менга ҳам айтмасдан Америкага кетиб қолди. Сценарийга бироз ўзгартириш киритиб, вазиятдан чиқиб кетдик», — дейди сериал режиссёри Замира Бегимқулова.
«Замира опа билан 8 йилдан буён кўришмасак-да, Facebook тармоғи орқали гаплашиб турамиз. Аммо Нилуфарни кўрмаганимга роппа-роса 10 йил бўлди. Куни кеча уй телефонига қўнғироқ қилиб, аранг боғланишга эришдик», — дейди сериалдаги Азизбек ролини гавдалантирган Жаъфар Мўминов.
«Ижодий гуруҳни чиндан ҳам соғиндим, сериал орқали қанчадан-қанча мухлислар кўнглидан жой олганмиз. Ҳаттоки, партнёрим Жафар билан кўчада юрсак, ёши катта онахонлар бахт тилаб, дуо қилган вақтлар ҳам бўлган», — дейди актриса Нилуфар Ҳамидова.
Учрашув давомида сериалдан ўрин олган тўй саҳнасидаги қизиқарли воқеалар ҳам айтиб ўтилди.
«Энг қизиғи, Нилуфар иккимизнинг тўйимиз куни, келин-куёв бўлиш картинасида Нилуфарнинг ҳаётдаги турмуш ўртоғи ва икки фарзанди ташриф буюрган эди. Ҳақиқатан ҳам, ажойиб бўлган эди», — дея ёдга олди актёр.
Сериалдаги узун сочли келин айни дамда сочини кесиб юборган, унинг айтишича, бунинг сабаби одамларнинг назари. «Ҳатто кўча-кўйда сочи ўзиникими ёки уламами, деб тортиб кўрадиганлар ҳам учраган», — дея қўшимча қилади актриса.
Изоҳ (0)