Хитой пойтахти Пекин касалхонасидан коронавирусга чалинган сўнгги икки бемор соғайиб чиқди ва шаҳарда COVID-19 беморлари қолмади. Бу ҳақда 26 август куни Гигиена ва соғлиқни сақлаш бўйича Пекин қўмитаси маълум қилди.
Таъкидланишича, пандемия бошланганидан буён илк бор Пекин касалхоналарида COVID-19 қайд этилган бирорта бемор қолмади.
Вирус тарқалиши бошланганидан буён Пекинда жами 935 кишида коронавирус аниқланган. Уларнинг 335 нафари июнь ойида «Синьфади» улгуржи бозорида юқтириб олган. Ушбу бозорда коронавирус инфекцияси аниқлангач, аҳоли вакилларининг шаҳар ҳудудидан чиқиши тақиқланган, бозорнинг ўзи эса ёпиб қўйилганди. Ушбу бозорда аниқланган вирус илгари Уханда аниқланган вирусдан анча юқумли бўлиши мумкин деб тахмин қилинган.
Айни пайтда шаҳарда кучсиз эпидемиологик назорат ўрнатилган. Кўчаларда ниқоб тақиш мажбурий эмас, аммо жамоат транспорти, дўкон, кинотеатр, давлат муассасаси ва бошқа одам кўп жойларда ниқоб тақиш шарт.
Статистикага кўра, Хитойда касалланганларнинг 94,13 фоизи соғайган. Коронавирус тарқалиши бошлангандан бери 85 мингга яқин киши коронавирусга чалинган. Мамлакатда 15 апрелдан буён ҳеч ким коронавирусдан вафот этмаган. Ўлим кўрсаткичи 5,45 фоиз бўлиб турибди (4,6 мингдан ортиқ одам вафот этган).
Эслатиб ўтамиз, 24 апрелда Уханда ҳам касалхоналарда коронавирусга чалинган бирорта бемор қолмаганини маълум қилган, бироқ орадан 2 ҳафта ўтиб, яна касалланиш ҳолати қайд этилганди. 5 июнда эса Уханда ва Хубэй провинциясида коронавирусга чалиниш бўйича бирорта ҳолат қайд этилмаган. Касалхонадаги сўнгги уч кишига жавоб берилган, коронавирусга чалинган бошқа беморлар қолмаган.
Мавзуга доир: Янги Зеландияда коронавирусга чалинган беморлар қолмади
Изоҳ (0)