Беларусь Олий суди Светлана Тихановскаянинг мамлакатдаги президентлик сайловларининг якуний натижаларига нисбатан билдирган шикоятини рад қилди. Бу ҳақда «Интерфакс» хабар берган.
«Шикоят муҳокама қилинмайди ва апелляция тартибида кўриб чиқилмайди», — дейилади суд хабарида. Тихановскаянинг адвокатлари ушбу қарор юзасидан яна шикоят киритмоқчи.
Тихановская сайловларда қайд этилган натижани бекор қилиш ва овозларни қалбакилаштириш ҳолати юзасидан жиноий иш очишни сўраганди. Суд бошқа номзодлар Анна Канопацкая ва Андрей Дмитриевнинг ҳам мурожаатини рад қилган.
Беларусь мухолифатининг мувофиқлаштирувчи кенгаши аъзолари Олий суднинг мазкур қарори суд ҳимоясини кафолатлайдиган конституцияга зид эканини таъкидлаган.
Беларусь президенти Александр Лукашенко мухолифат томонидан мувофиқлаштирувчи кенгаш тузилишини ҳокимиятни эгаллашга уриниш деб баҳолаганди ва «муносиб чоралар» кўриши ҳақида огоҳлантирганди. Шундан сўнг мувофиқлаштирувчи кенгаши тузилгани сабабли жиноят иши қўзғатилганди.
Аввал МСК ҳам президентлик сайловлари юзасидан номзодларнинг шикоятларини қайтарганди. Тихановскаядан ташқари бошқа номзодлар — Андрей Дмитриев, Анна Канопацкая ва Сергей Черечень ҳам шикоят киритган.
Беларусда МСК берган расмий маълумотларга кўра амалдаги президент Александр Лукашенко 80 фоиздан кўпроқ овоз олган, Светлана Тихановская эса 10 фоиз атрофида овоз тўплаган.
Сайловлар куни оқшомда мамлакатнинг барча етакчи оммавий ахборот воситаларининг сайтлари очилмай қолди. Минскда президент сайловидан кейин халқнинг норозилик намойиши бошланди. Шундан буён мамлакатда норозилик намойишлари ва бошқа хориж давлатларида намойишчиларни қўллаб-қувватлаш учун чиқишлар давом этмоқда.
Изоҳ (0)