Ўзбекистонда ОТМларга кириш имтиҳонлари 2 сентябрдан бошланиши, Тошкент шаҳрининг кириш имтиҳонлари ўтказиладиган 4 та ҳудудида тайёргарлик жараёнлари олиб борилаётгани тўғрисида хабар берилганди. Ижтимоий тармоқларда 26 август, чоршанба куни Тошкент шаҳрида ёғингарчилик кузатилаётгани сабаб имтиҳонлар учун тайёрлаб қўйилган парта-стуллар целлофан билан қоплаб чиқилаётгани тасвирланган суратлар тарқалмоқда.
Суратларга кўра, целлофан билан ўралган абитуриентлар учун тайёрланган парталар Алишер Навоий номидаги Миллий боғ ҳудудида жойлашган.
Эслатиб ўтамиз, Президент Шавкат Мирзиёев 6 август куни 2020 йилда олий таълим муассасаларига қабулни ташкил қилиш ва 2020/2021-ўқув йилига тайёргарлик кўриш масалалари юзасидан йиғилиш ўтказган эди. Унда ёпиқ бинолар эпидемиологик талабга жавоб бермаслиги, ижтимоий масофага риоя қилинган тақдирда имтиҳонлар вақти анчага чўзилиб кетишини инобатга олиб, тест синовларини Тошкент ва Нукус шаҳарлари, вилоятлар марказларидаги стадионларда ташкил этиш юзасидан топшириқ берилган.
Маълумот учун, ОТМларга кириш имтиҳон учун Олмазор тумани ҳудудида 2 та нуқта: 76 та гуруҳда 2280 нафар абитуриентга мўлжалланган Талабалар шаҳарчаси хиёбони ва 16 та гуруҳда 480 нафар абитуриентга мўлжалланган «Ғалаба боғи» ҳудудидаги ёпиқ саҳна майдони имтиҳон ўтказиш учун тайёрланган. Ботаника боғида кириш имтиҳонларида тест топширувчи абитуриентлар учун 720 та ўрин ташкил этилган. «Пахтакор» стадионда эса кириш имтиҳонлари учун стол-стулларни жойлаштириш жараёни кетмоқда. Имтиҳонлар вақтида ҳудуд 3 та: А, B, C секторларига бўлинган. Уларнинг ичида энг каттаси А сектор бўлиб, у ерда 1030 нафар, B секторда 785 нафар, C секторда эса 630 нафар, жами 2520 нафар абитуриент тест топшириши мумкин.
Изоҳ (0)