Тошкент шаҳар Фавқулодда вазиятлар бошқармаси ва Миробод туман ФВБ қутқарув гуруҳлари томонидан Миробод тумани Эски Отчопар 2-тор кўчасида жойлашган хонадонларнинг бирида канализация мақсадида қазилган 5 метрли чуқурликка эҳтиётсизлик оқибатида тушиб кетган фуқарога ёрдам кўрсатилди. Бу ҳақда Тошкент шаҳар фавқулодда вазиятлар бошқармасининг ахборот хизмати хабар берди.
Хабарга кўра, чуқурга тушиб кетган фуқаронинг чап оёқ болдири, ўнг қўл тирсаги синган ва боши ёрилган. У чуқурликдан махсус замбилда чиқариб олинган ва 1-сон Республика клиник шифохонасига юборилган.
Аввал июль ойида Қашқадарё вилоятининг Қарши шаҳрида тўрт қаватли уйнинг тўртинчи қаватидаги хона эшиги қулфланиб қолиши оқибатида уйда қолиб кетган 4 ва 2 ёшли бола Фавқулодда вазиятлар бошқармаси қутқарувчилари томонидан соғ-саломат олиб тушилгани, Сурхондарё вилоятида ФВБ қутқарув отряди лифт ичида қамалиб қолган қизчани қутқариб қолгани, шунингдек Жарқўрғон туманида каналга тушиб кетган Damas автомобиль олиб чиқилгани ҳақида хабарлар берилган.
Изоҳ (0)