Баҳрайн ҳукумати 1 июлдан бери амалда бўлган хорижлик сайёҳларни 10 кунлик мажбурий карантинга олиш тартибини бекор қилди. Бу ҳақда «РИА Новости» хабар берган.
Мажбурий изоляцияда бўлиш тартибининг бекор бўлишига мамлакатда коронавирус инфекциясига чалинишлар сони камайгани билан боғлиқ: 2020 йил 1 июлдан 16 августгача бўлган оралиқда хорижлик туристларнинг 0,2 фоизида COVID-19 борлиги аниқланган.
Баҳрайн ҳудудига кириш учун ҳали ҳам иккита тест топшириш талаб этилади: биринчиси мамлакатга келган заҳоти аэропортда топширилади, иккинчи тест эса турист ҳудудга кирганидан кейин 10 кун давомида (агар ундан қисқа муддатга келган бўлмаса).
Тестларни топшириш нархи — 60 Баҳрайн динорига тенг (тахминан 156 АҚШ доллари).
Шунингдек, турист BeAware Bahrain иловасини юклаб олиши ва ишга тушириши, коронавирусга топширган тестида манфий натижа чиқмагунига қадар карантинда қолишини кафолатловчи декларацияни тўлдириши талаб қилинади. Сайёҳлар тест натижасини қаерда кутиши ва ушбу жараёнга қанча вақт сарф этилиши ҳақида ҳукумат ахборотида айтилмаган.
Туроператорларнинг қайд этишича Баҳрайнда мажбурий тартибдаги карантиннинг туристлар учун бекор қилиниши ушбу мамлакатга саёҳат қилувчилар сонини кескин оширмайди.
Июль ойида Баҳрайнда микроорганизмлар, хусусан, коронавирусни йўқ қила оладиган робот ишлаб чиқилгани ҳақида хабар қилинганди.
Изоҳ (0)