Индонезиядаги Бали курорт ороли коронавирус пандемияси билан боғлиқ вазият туфайли 2020 йил охирига қадар хорижлик сайёҳлар учун ёпиқ бўлади. Бу ҳақда Jakarta Post хабар тарқатган.
Аввал оролнинг халқаро туризм учун 11 сентябрдан бошлаб очилиши мумкинлиги тахмин қилинганди.
«Индонезия ҳукумати ҳали ҳам аҳолига хорижда саёҳат қилишни тақиқламоқда ва бу камида 2020 йил охиригача давом этади. Мазкур сиёсатга мос равишда хорижлик сайёҳлар учун ҳам ўз чегараларимизни оча олмаймиз. Мамлакатдаги, жумладан, Балидаги вазият етарли даражада хавфсиз эмас», – дея Бали ороли губернатори Ваян Костер сўзларини келтирган нашр.
«Биз эҳтиёткор бўлишимиз керак, бу ишда шошилмаслик зарур. Бали ороли туризмни қайта тиклашда омадсизликка учрамаслиги лозим, сабаби бундай сценарий Индонезиянинг имижига салбий таъсир қилади», – дея қўшимча қилган у.
Мавзуга доир: Таиланд ҳукумати сайёҳлар учун 2021 йилда ҳам чегаралар ёпиқ бўлиши мумкинлигини инкор этмади
Газетада ёзилишича, Бали ороли коронавирус пандемияси туфайли иқтисодий жиҳатдан катта йўқотишларга учраган. Туризм секторида банд бўлган камида 2667 нафар одам ишидан айрилган, 73 мингдан зиёд киши ҳақ тўланмайдиган меҳнат таътилига чиқишга мажбур бўлган.
Сўнгги маълумотларга кўра Индонезияда COVID-19 коронавирус инфекциясига чалиниши билан боғлиқ ҳолатлар сони 155 мингтадан ошган. 6759 нафар бемор касаллик асоратлари оқибатида вафот этган.
Изоҳ (0)