АҚШда COVID-19 беморлари касалликдан тузалиб чиққан мижозлар қон плазмасини қуйиш усули орқали даволаниш ҳуқуқига эга бўлди. Тегишли рухсат АҚШ соғлиқни сақлаш ва ижтимоий хизматлар вазирлиги ҳузуридаги Озиқ-овқат маҳсулотлари ва дори воситалари сифати бўйича санитария назорати бошқармаси (FDA) томонидан берилган.
«Бугун Озиқ-овқат маҳсулотлари ва дори воситалари сифати бўйича санитария назорати бошқармаси COVID-19’ни даволашда тузалган мижозлар қон плазмасини қуйиш тажрибасидан фойдаланишга фавқулодда рухсат берди», — деб таъкидланган ҳужжатда.
Мутахассислар бундай усул самарали бўлиши мумкин деган хулосага келган, шунингдек, унинг аниқланган афзалликлари юзага келиши мумкин бўлган салбий жиҳатлардан устун келган. Assosiated Press’нинг ёзишича, президент Дональд Трамп бу қарорни «катта ютуқ» деб атади.
Агентлик маълумотларига кўра, даволашнинг бундай усули муайян натижа берган, аммо унинг самарадорлиги ҳали ҳам баҳсли. Чунки унинг ножўя таъсир этиши эҳтимоли, шунингдек, инфекция ўтиши хавфи мавжуд.
Жонс Ҳопкинс’да келтирилган сўнгги маълумотларга кўра, АҚШ коронавирусга чалинган ва ундан вафот этганлар сони бўйича дунёда биринчи ўринда. Мамлакатда пандемия бошланганидан буён 5,7 миллиондан ортиқ киши касалланган, 176 мингдан ортиғи вафот этган.
Эслатиб ўтамиз, Ўзбекистонда эндиликда коронавирусга чалинган беморларни даволаш учун соғайиб кетганларнинг қон зардобидан антитана мақсадида фойдаланилиш йўлга қўйилиши, бу касаллик оғир кечаётган ёки узоқ давом этаётган беморларга вирусни тезроқ ва осонроқ енгиш учун қўшимча курашиш манбаси бўлиб хизмат қилиши ҳақида хабар берилган эди.
Бундай даволаш усули Буюк Британия шифокорларида катта қизиқиш уйғотганди. Бироқ Соғлиқни сақлаш вазирлиги ҳузуридаги Коронавирусга қарши кураш штаби аъзоси Ҳабибулла Оқилов Ўзбекистонда коронавирусдан соғайганларнинг қон зардобидан фойдаланишга ҳозирча эҳтиёж йўқлигини маълум қилган.
Изоҳ (0)