Тошкентнинг Бектемир тумани майдони Тошкент вилоятининг Ўрта Чирчиқ ва Юқори Чирчиқ туманлари ҳудудларини қўшиш ҳисобига кенгайтирилади. Бу ҳақда Президент Шавкат Мирзиёев 21 август куни туман фаоллари билан бўлиб ўтган учрашувида маълум қилган.
Президент матбуот хизматининг ёзишича, Тошкент вилоятининг Ўрта Чирчиқ ва Юқори Чирчиқ туманларидан жами 1639 гектар ер ўтказилади. Натижада туман ҳудуди 3472 гектарга етади.
«Нима учун (туман ҳудудини кенгайтиряпмиз)? Саноат корхоналарини кўпайтирмоқчимиз. Катта режалар қўйдикки, мана шу Бектемирга Тошкент вилоятидан қўшилаётган жойлари, сизлар билан бамаслаҳат, худди Сергелида қурганимизга ўхшаб, энг камида 50 минг, 70 минг одамга яраша кўп қаватли уйлар қурмоқчимиз. Бектемирни мутлақо бошқача қиламиз. Марказдан Бектемирга кўчиб келадиган қиламиз», — дейди Президент (иқтибос «Ўзбекистон 24» телеканали лавҳасидан олинди).
Шавкат Мирзиёевнинг сўзларига кўра, келажакда Бектемир тумани аҳолисини 200 минг кишига етказиш режалаштирилган.
«Бунинг учун бизда барча имкониятлар мавжуд. Бектемир тумани катта имкониятларга эга», — дейди давлат раҳбари.
ДСК Бинокор (йирик панелли уй-жой қурилиши учун темир-бетон буюмлар ишлаб чиқарувчи) мажмуасига ташрифи чоғида давлат раҳбари ўз сайловолди дастурида Тошкентда 500 та кўп қаватли биноларни қуриш бўйича ваъдасини қисқа вақт ичида бажарганини таъкидлаган.
«Уй қурилиш соҳасида биз бор тажрибамизни 25 йил йўқ қилиб, барбод қилдик. На қурувчи пайдо бўлди, на кранчи пайдо бўлди. Биз бошлаганимизда Тошкентда 10 та баланд кран йўқ эди. 500 та уйни 5 йилда қураман, деб ваъда берган эдим сайловолди дастуримда. 2,5 йилда қурдик. Фақат Сергелида», — дейди Президент.
Аввалроқ Бектемир тумани ҳокими Шоҳрух Мамажонов ва туман секторлари раҳбарлари Президент ташрифидан сўнг лавозимларидан озод қилингани тўғрисида хабар берилганди.
Мавзуга доир: Сергелидаги Янги ҳаёт кичик тумани майдони пойтахт ва Тошкент вилоятидаги 6 туман ҳудуди ҳисобига кенгаяди
Изоҳ (0)