Тошкент вилояти Юқори Чирчиқ туманидан ўтувчи 4Р12 Бектемир—Чорбоғ автомобиль йўлининг 16-километрида 6 август куни Шайхонтоҳур туманида яшовчи фуқарога тегишли бўлган Honda русумли мотоцикл 70 км/соат тезлик белгиланган жойда 166 км/соат тезлик билан ҳаракатланган. Бу ҳақда Ички ишлар вазирлиги Йўл ҳаракати хавфсизлиги бош бошқармаси хабар берди.
Маълум қилинишича. 10 июль куни мазкур автомобиль йўлининг 34-километрида Тошкент шаҳри Олмазор туманида истиқомат қилувчи фуқарога тегишли бўлган Suzuki мотоцикли 147 км/соат тезлик билан ҳаракатланган.
Ушбу мотоцикл эгаларига нисбатан Ўзбекистон Республикаси Маъмурий жавобгарлик тўғрисидаги кодекснинг 128-3-моддаси 3-қисмига (транспорт воситалари ҳайдовчиларининг белгиланган ҳаракат тезлигини соатига 40 километрдан ортиқ катталикда ошириб юбориши) биноан базавий ҳисоблаш миқдорининг 9 баравари миқдорида жарималар белгиланиб, жарима қарорлари яшаш манзилларига жўнатилган.
Йўл ҳаракати хавфсизлиг бош бошқармаси хабарига кўра, содир бўлаётган йўл-транспорт ҳодисалари ва мотоциклларнинг хавфли ҳаракатлари кўпгина ҳаракат иштирокчиларининг эътирозларига сабаб бўлаётганлигини инобатга олиб, Тошкент вилояти ИИББ ЙҲХБ томонидан дам олиш кунлари вилоятнинг 4Р12 Бектемир—Чорбоғ автомобиль йўлида «Мотоцикл» тадбири ўтказилди. Тадбирни айнан шу йўлда ўтказилишининг сабаби дам олиш кунлари кўплаб фуқаролар тоғли ҳудудларга айнан шу йўл орқали боради. Мотоциклда дам олишга борувчи ишқибозлар ҳам шу йўлда кўпроқ учрайди.
Тадбир давомида 20 дан ортиқ мотоцикл тўхтатилди. Улардан 7 нафарига нисбатан белгиланган тартибда маъмурий баённомалар расмийлаштирилди. Ҳайдовчиларнинг тегишли ҳужжатлари бўлмаганлиги сабаб 5 та мотоцикл вақтинча жарима майдонига киритилди. Бундан ташқари 3 та ҳолатда мотоцикллар давлат рақам белгиларини яшириб олганлиги аниқланди.
Таъкидланишича, ушбу 4Р12 Бектемир—Чорбоғ автомобиль йўлида мотоциклларнинг тез ҳаракатланишини ҳисобга олиб, мунтазам равишда махсус автоматлаштирилган фоторадар техника воситалари ишлатилмоқда. Ушбу фоторадарлар 2020 йилнинг ёзи бошидан буён 65 нафар мотоциклчи томонидан тезликни меъёридан ошириш ҳолатларини аниқлаган. Буларнинг барчаси аҳоли яшаш жойида, яъни 70 км/соат тезлик белгиланган жойда 110 км/соатдан ортиқ тезлик билан ҳаракатланганлар ҳисобланади.
Изоҳ (0)