Тошкент шаҳрининг Бектемир туманига Жаҳонгир Иброҳимов ҳоким этиб тайинланди. Бу ҳақда Тошкент шаҳар ҳокимлиги маълум қилди.
Жаҳонгир Иброҳимов 1982 йилда Тошкент вилоятида туғилган. У 2006 йилда Тошкент архитектура-қурилиш институтини тамомлаган.
Мазкур тайинловга қадар Жаҳонгир Иброҳимов 2017—2020 йилларда Сирдарё вилояти ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари бўлиб ишлаган.
Эслатиб ўтамиз, Президент Шавкат Мирзиёев 21 август куни Тошкент шаҳар Бектемир туманида бажарилаётган ишлар, саноат корхоналари фаолияти билан танишди. Давлат раҳбари туман фаоллари билан учрашди. Учрашув чоғида Президент туман раҳбарларининг иш услубини танқид қилган. Шундан сўнг Бектемир тумани ҳокими Шоҳрух Мамажонов ҳамда сектор раҳбарлари ўз лавозимларидан озод қилинди.
Аввалроқ Сергели туманига Элбек Шукуров ҳоким этиб тайинлангани ҳақида хабар берилганди.
Изоҳ (0)