Санитария-эпидемиологик осойишталик агентлиги директори ўринбосари Баҳодир Алматов 25 август, сешанба куни бўлиб ўтган брифингда коронавирус пандемияси шароитида Ўзбекистон мактабларида дарслар давомийлигини 30 дақиқа этиб белгилаш таклиф этилганини маълум қилганди. Мазкур матбуот анжуманида халқ таълими вазири Шерзод Шерматов дарслар 45 дақиқа давом этиши тарафдори эканини айтди.
«Дастлабки вариантда дарслар давомийлиги 30 дақиқа дейилди. Албатта, қайсидир давлатларда камайтирилгандир. Кеча бу масалани ҳукумат даражасига олиб чиқдик, экспертлар билан муҳокама қилдик. Биз 45 дақиқали дарсга ўрганиб қолганмиз, уни сақлаб қолишимиз керак. Балки қайсидир фанларни бошида камайтирармиз, лекин дарслар давомийлигини 45 дақиқада қолдиришга ҳаракат қиламиз. Биз ‘Битта ўқувчи — битта синф’ режимини бошидан охиригача қўллаймиз. Карантиннинг ёпиқ алгоритимига келсак, илгари битта жойда коронавирус аниқланса, ўша жой 14 кун ёпилар эди. Энди мутахассислар тажрибага эга бўлди, вирус бир синфда аниқланса, ўша синфнинг ўзи карантинга олиниб, дарслар онлайн тарзда ўтказилади. Бу лойиҳа жойларга муҳокама учун юборилган», — дея маълум қилди халқ таълими вазири.
Аввалроқ Ўзбекистондаги давлат мактабларида 2020/2021-ўқув йилида мажбурий мактаб формаси талаб этилмаслиги ҳақида хабар берилганди.
Эслатиб ўтамиз, Ўзбекистон мактабларида янги ўқув йилини 14 сентябрдан бошлаш таклиф қилинмоқда. Ҳозирда Халқ таълими вазирлиги янги ўқув йилини бошлаш бўйича 3 та сценарий устида ишламоқда.
Изоҳ (0)