Американинг J.D.Power таҳлил агентлиги янги автомобилларнинг техник инновацияси рейтингини тузиб чиқиб, уларнинг амалиётга қанчалик яхши жорий этилганини аниқлади, деб хабар беради Motor.
Америка компанияси 2020 йилда қайси автомобиль маркалари энг кўп техник инновациялардан фойдаланиб, америкалик истеъмолчиларга маъқул келганини аниқлади. Бунинг учун TXI индекси (Tech Experience Index) яратилган бўлиб, унинг ёрдамида юқори технологиялари ва автомобиль эгасининг ундан қониқиш даражаси баҳоланган. Натижада Volvo энг юқори технологияга эга автомобиль дея топилган: ушбу марка 617 индекси билан 1-ўринни эгаллаган.
Иккинчи ўрин BMW’га (583) насиб этган бўлса, кучли учликка Cadillac (577) якун ясаган. Унинг ортидан Mercedes-Benz (567) ва Genesis (559) ўрин олган. Олтинчи ўринни Hyundai эгаллаган бўлиб (556), бу ҳамёнбоп маркалар орасида энг яхши натижа ҳисобланади. Америкаликлар энг ёмон марка дея Mini’ни танлаган — 444. Мамлакатнинг 15 штатида ўз мижозлари орасида сўров ўтказишни тақиқловчи Tesla компанияси эса 593 балл тўплаган. Истеъмолчилар энг фойда берадиган инновация дея атрофни кузатиш тизимини баҳолаган, энг ёқмагани — қўл ҳаракатлари ёрдамида бошқариладиган мультимедиа тизими.
Эслатиб ўтамиз, J.D.Power’нинг июнь ойидаги энг сифатли автомобиллар рейтингида Tesla энг охирги ўринни эгаллаган эди.
Изоҳ (0)