Коронавирусга қарши кураш штаби аъзоси Наргиза Нуруллаева АОКА залида ташкил этилган брифингда антитаначалар таҳлили юзасидан берилган саволларга аниқлик киритиб ўтган.
Жумладан, «Коронавирусга қарши антитаналарни аниқловчи тест диагностика нега бунчалик қиммат? Уни ҳам арзонроқ қилишнинг иложи йўқми?», деган саволга жавобан мутахассис хусусий клиникалар антитаначаларни аниқлайдиган реактивларни ўзлари сотиб олиши сабабли нархларни мустақил белгилашини маълум қилган.
Шунингдек, Нуруллаева антитаначалар таҳлили нималардан иборатлиги борасида ҳам тушунча бериб ўтган. Унга кўра, инфекцион жараённинг кечиш фазаси инсон организмида турли муддатларда ишлаб чиқарилувчи IgM ва IgG каби 2 та синфга оид антитаналарни аниқлаш имконини беради.
М (IgM) синфга оид иммуноглобулинлар, тахминан, зарарланиш бошланган кундан еттинчи суткаларига келиб шакллана бошлайди, бир ҳафтадан сўнг энг юқори даражага етади, икки ҳафта давомида эса унинг концентрацияси аста-секин камайиб боради. Бир вақтнинг ўзида, тахминан, уч ҳафтадан ёки сал аввалроқ G (IgG) синфидаги иммуноглобулинлар аниқланади. Қонда айнан G синфига оид иммуноглобулинларнинг аниқланиши инфекциянинг ўтказилганлигидан далолат бериши қўшимча қилинган.
Мавзуга доир: Олимлар иммунитет ҳосил бўлиши учун қанча одам коронавирусга чалиниши кераклигини маълум қилди
Эслатиб ўтамиз, аввалроқ штабнинг бошқа бир аъзоси Севара Убайдуллаева томонидан коронавирус мутацияга учраб штаммининг ўзгариши организмда касалликнинг кечириб ўтказилган турига нисбатан ҳосил бўлган иммунитет кейинги штаммга нисбатан камроқ бўлиши ёки ҳимояланмаган бўлиши мумкинлиги айтилгани, Ўзбекистонда антитана таҳлили ўтказилиб, аҳолининг қанча қисмида коронавирусга иммунитет борлиги аниқланиши, антитаналарга эга организмда энг камида 2-3 ой қайта касалланиш бўлмаслиги ҳақида ҳам хабарлар берилган эди.
Изоҳ (0)