Ўзбекистонда Инқирозга қарши курашиш жамғармасининг маблағлари ҳисобидан амалга оширилган давлат харидлари бўйича батафсил маълумотлар эълон қилинди. Молия вазирлигининг ахборот хизмати мазкур маълумотларнинг ҳар ҳафтада янгилаб турилиши ҳақида хабар берган.
Ҳисоботларда республикада қайси ташкилотга қанча маблағ ажратилгани, давлат харидлари бўйича тузилган шартномалар, етказиб берувчиларнинг бенефициарлари каби ахборотлар ўрин олган.
Шунингдек, Молия вазирлиги сайтида интерактив саҳифа очилган. Айни пайтдаги маълумотлар 18 август ҳолати бўйича келтирилган.
Жамғарма ҳисобидан сарфланаётган маблағлар ҳақидаги маълумотларнинг очиқланиши кенг жамоатчиликка, журналистлар ва блогерларга бу борада мустақил суриштирувлар ўтказиш имконини беради.
Эслатиб ўтамиз, Инқирозга қарши жамғармаси Президент томонидан коронавирус пандемияси ва глобал инқирозли ҳодисаларнинг иқтисодиёт тармоқларига салбий таъсирини юмшатиш бўйича биринчи навбатдаги чора-тадбирлар доирасида 2020 йилнинг март ойида тузилган. Май ойида жамғарма маблағларининг 3 триллион 306 миллиард сўми ишлатилган бўлиб, уларнинг аксарияти (1,4 триллион сўм) иқтисодиётни қўллаб-қувватлашга йўналтирилганди.
Инқирозга қарши курашиш жамғармасига 10 триллион сўм йўналтирилган бўлиб, у учта халқаро ташкилотдан олинган қарзлар ҳисобига шакллантирилган: маблағларнинг 41,9 фоизи Осиё тараққиёт банки, 37,9 фоизи Халқаро валюта жамғармаси, 20,2 фоизи Халқаро ривожланиш ва тараққиёт банки томонидан ажратилган.
2020 йил 18 август ҳолатига кўра, жамғармадан 8 триллион 448,7 миллиард сўм миқдорида маблағ ажратилган, шундан 6 триллион 753,5 миллиард сўми тегишли ташкилотлар томонидан ўзлаштирилган.
Изоҳ (0)