Республика махсус комиссияси Ўзбекистон фуқароларини Россиянинг Шимолий Кавказ ва Жанубий федерал округлари, ҳамда Самара вилоятидан олиб келиш учун Тошкент—Ростов-Дон—Тошкент ва Тошкент—Кинель—Тошкент темир йўл рейсларини ташкил этиш тўғрисида қарор қабул қилди. Бу ҳақда Ташқи ишлар вазирлигининг ахборот хизмати хабар берган.
Хабарда қайд этилишича, мазкур масала Ташқи ишлар вазирлиги томонидан Транспорт вазирлиги билан биргаликда ишлаб чиқилган ва Республика махсус комиссиясига киритилган.
Ўзбекистоннинг Ростов-Дон шаҳридаги бош консулхонаси берган маълумотга кўра, 23 августда ичида 927 нафар ўзбекистонлик бўлган поезд «Первомайская» бекатидан Тошкентга жўнаган.
Ўзбекистоннинг Қозон шаҳридаги бош консулхонаси «Ўзбекистон темир йўллари» АЖ поезди Самара вилоятининг «Кинель» станциясига 24 август, душанба куни етиб келиши режалаштирилганини билдирган.
Россиядан олиб келинган фуқаролар Республика махсус комиссияси томонидан белгиланган талабларга қатъий риоя қилган ҳолда маълум муддат карантинда бўлади.
Аввал ҳам Республика махсус комиссияси қарорига асосан Россиянинг Шимолий Кавказ ва Жанубий федерал округларидаги ўзбекистонликларни олиб келиш учун Тошкент—Ростов-Дон—Тошкент йўналиши бўйича темир йўл рейси ташкил қилинган. 10 август куни Гниловская—Тошкент йўналишида ҳаракатланишни бошлаган поезд 13 август куни 918 нафар фуқарони Ўзбекистонга олиб келган.
9 августда Россиядан поездда олиб келинган 918 нафар ўзбекистонлик Намангандаги карантин зонасига жойлаштирилган. Шунингдек, шу куни бошқа бир поезд Самарадан Самарқандга ўзбекистонликларни олиб келган.
Изоҳ (0)