Ўзбекистонда 15 августдан карантин чекловлари юмшатилиб, шахсий ва жамоат транспорти ҳаракати, кўплаб фаолият турлари босқичма-босқич қайта тикланди. Бироқ шу кунгача Андижон ва Фарғона вилоятлари ўртасида транспорт қатновлари тўла тиклангани йўқ — Фарғона томондан йўллар тўсилганича қолмоқда.
Икки вилоятни Асака ва Қува туманларидан ўтувчи асосий йўли ва Шаҳрихон—Қува йўли блокпост билан беркитилган, икки вилоят аҳолиси учун умуман тескари бўлган Бўстон—Ёзёвон чегараси очиқ холос, дейилади «Kun.uz»да эълон қилинган мақолада.
Мақолада қайд этилишича, транспортда Ёзёвон томон билан Фарғонага ўтиш ёки Фарғонадан Андижонга келиш — 150 километрни айланиб ўтиш дегани.
Муаллифлар аҳоли мурожаатларини ўрганиш мақсадида иккала жойга бориб, йўллар бетон тўсиқлар билан беркитиб қўйилгани, икки вилоят ўртасида транспорт ҳаракати деярли тўхтатилганининг гувоҳи бўлган.
15 августдан сўнг чегаралардаги Андижон вилоятига қарашли блокпостлар олиб ташланган бўлиб, фақат Фарғона вилояти томонидан қўйилган постлар қолибди.
Фарғона вилояти постларида хизмат вазифасини олиб бораётган Миллий гвардия хизматчилари ва Қува СЭОМ ходимлари постларни олиб ташлаш ҳақида қарор чиқмаганини айтмоқда.
Аҳоли транспорт қатнови йўқлиги сабаб чегарага келиб жамоат транспортидан тушади ва блокпостдан ўтиб, нариги томонда турган автоуловга чиқади. Оқибатда ортиқча оворагарчиликлар юзага келмоқда. Пишиқчилик пайтида боғбон ва тадбиркорлар етиштирган мевалари ва маҳсулотларини олиб ўтишда қийинчиликка учрамоқда.
«Kun.uz»даги мақолада муаллифлар Асака—Қува чегарасидаги ҳолат билан ҳам танишгани ҳақида ёзган.
«Блокпостга яқинлашишимиз билан Асака томонидаги йўлнинг икки томони таксилар билан тўла экан. Одамлар чегарага яқинлашганида автомашинадан тушади ва икки блокпост орасидаги 100 метрлик масофани босиб ўтиб, нариги вилоят таксичиларининг автоуловига ўтиради.
Андижон томон постни олиб ташлаган. Фарғона томонда турган пост ходимлари ‘юқори’дан келган буйруққа асосан ишлашаётганини айтишди», — дейилади мақолада.
«Бу ерни беркитишгани билан бошқа ‘обезд’ (айланма) йўллардан барибир қатнов бўляпти. Мен уйимни олдида ўтира олмаяпман, техника кўп ўтяпти. Одамлар сарсон бўляпти», — дейди йўловчилардан бири.
«Биз ҳозир манави ерга келиб, мана тушиб, у ёғига юз метр юриб, яна таксига чиқиб кетяпмиз. Фарғоналикман. Касалхонадаги синглимни кўргани кетяпман. Зарур бўлгани учун ўтади-да одамлар. Ёки ҳали вилоятлар ўртасидаги қатновлар тикланмадими?», — дейди бошқа бир йўловчи.
Шаҳрихон—Қува йўлида ҳам худди шу аҳвол. У ерда йўл берк ва Фарғона томонда блокпост ишлаб турибди. Аҳоли вакиллари ҳолатдан ҳайрон эканини билдирган.
Маълумот учун, Андижон ва Наманган вилоятларини боғлаб турувчи йўлларга қўйилган ҳар икки вилоятнинг блокпостлари олиб ташланган.
Аҳоли вакиллари Фарғона вилояти мутасаддиларидан ноқулайликлар туғдираётган муаммоли ҳолатни бартараф қилишни сўрамоқда.
Изоҳ (0)