Ажойиб теле ва радиобошловчи Ларри Кинг оғир дамларни бошидан ўтказмоқда. Бир ҳафта аввал унинг ўғли Энди Кинг тўсатдан вафот этган эди, 20 август, пайшанба куни эса қизи Чайя Кинг оламдан ўтди. Маълумотларга кўра, Чайя ўпка саратони билан курашаётган эди. Бошловчининг қизи унинг учинчи хотини Элин Эйкинс билан иккинчи маротаба турмуш қургандан сўнг туғилган. Ўғли Энди аёли Элиннинг собиқ турмуш ўртоғидан бўлиб, Ларри унга биринчи марта уйланганида асраб олган эди.
Сўнгги икки йил Ларри учун машаққатларга бой бўлди. 2019 йил апрель ойида бошловчи иккинчи марта юрак хуружига учради, натижага кўра, унга ангиопластика ташхиси қўйилди. Жарроҳлик амалиёти ўтказилишига бир ой қолгунча Ларри ҳафталаб комада ётди. 2019 йил май ойига келиб у деярли ўлимга олиб келадиган инсультга учради. Орадан уч ой ўтиб Ларри 22 йил мобайнида бирга яшаган хотини Шон билан ажрашишга қарор қилди.
«Март ойида менда юрак хуружи рўй берди, у ойда нималар бўлганини эслай олмайман, сабаби комада эдим. Жуда қийин йил бўлганди. Ҳозир деярли ҳаммаси яхши, чап оёғимдан ташқари. Ҳар куни реабилитация марказига бораман, шифокорларнинг айтишига қараганда, Янги йилгача ўзим юриб кетаман. Ҳозирча ҳассага суянаман. Машинамдан фойдаланганим йўқ, аммо ишга қайтдим, бу мени хурсанд қилади», — дейди Ларри ноябрь ойида берган интервьюсида.
Шунингдек, Ларрига 2017 йил ўпка саратони касаллиги қўйилган ва ундан бу ўсимтани олиб ташлаш бўйича қилинган жарроҳлик амалиёти муваффақиятли ўтган. Ундан ҳам аввалроқ Ларрида илк юрак хуружи 1987 йилда юз берган. 1999 йил простата бези саратони ташхиси қўйилган. Шундай бўлишига қарамай, Ларри Кинг ўзининг профессионал фаолиятини давом эттирмоқда. Унинг «Larry King Now» муаллифлик кўрсатуви RT America ва Hulu сайтида намойиш этилади.
Изоҳ (0)