Туркча пиденинг италянча пиццадан фарқли томони шаклида бўлса, ўхшашлиги иккиси ҳам печда пиширилади. Анъанага кўра егуликнинг ичига қийма, помидор, қалампир, пиёз ва кўкатлар, гоҳида хачапури сингари тухум ва пишлоқ солиб тайёрланади.
Керакли маҳсулотлар:
- ун — 510 гр;
- хамиртуруш кукуни — 10 гр;
- ўсимлик ёғи — 25 мл;
- сув — 240 мл;
- майданоз (петрушка) — 40 гр;
- саримсоқ — 20 гр;
- қийма — 700 гр;
- чили қалампири — 1 дона;
- ширин қалампир — 200 гр;
- пиёз — 180 гр;
- зира — 2 чой қошиқ;
- қалампир кукуни — 1 чой қошиқ;
- томат пастаси — 40 гр;
- зайтун ёғи — 50 мл;
- таъбга кўра туз, мурч ва шакар.
- Ун, хамиртуруш кукуни, 5 граммдан туз ва шакар, қайнаган сув ва 25 мл ёғ миксер ёрдамида аралаштирилади. Аралашма хамир ҳолига келтирилиб, ёғланган идишга солинади ва усти ёпилган ҳолда иссиқ жойга 40-60 дақиқага қўйилади.
- Товада майдаланган пиёз сели чиққунча зира билан бирга қовурилади, сўнг майда бўлакланган қалампир ва саримсоқ 2 дақиқа давомида, кейин қийма 10-15 дақиқа қовурилади. Устидан томат пастаси, мурч, қалампир кукуни, туз ва шакар таъбга кўра солиниб, 2-3 дақиқа қовурилади. Олов ўчирилгандан сўнг майдаланган майданоз (петрушка)нинг ярми солинади.
- Тайёр бўлган хамир ёйилади ва тенг бўлакка бўлинади. Узун қилиб ёйилган хамир махсус пишириқ қоғозига жойлаштирилади. Қиймали аралашманинг бир қисми хамирнинг устига ёйилади ва хамирнинг чет қисмидан 2-3 см жой қолдирилади. Хамирнинг чети букилади ва узунчоқ кема шакли ҳосил қилинади. Хамир атрофи зайтун ёғи билан ёғланади ва 180 даражага печга қўйилади. Пиде усти қизаргунга қадар 15-20 дақиқа давомида пиширилади.
- Тайёр бўлган пиде устига майданоз сепилади ва энига бўлакланиб, иссиқ ҳолда дастурхонга тортилади.
Изоҳ (0)