Turkcha pidening italyancha pitssadan farqli tomoni shaklida bo‘lsa, o‘xshashligi ikkisi ham pechda pishiriladi. An’anaga ko‘ra yegulikning ichiga qiyma, pomidor, qalampir, piyoz va ko‘katlar, gohida xachapuri singari tuxum va pishloq solib tayyorlanadi.
Kerakli mahsulotlar:
- un — 510 gr;
- xamirturush kukuni — 10 gr;
- o‘simlik yog‘i — 25 ml;
- suv — 240 ml;
- maydanoz (petrushka) — 40 gr;
- sarimsoq — 20 gr;
- qiyma — 700 gr;
- chili qalampiri — 1 dona;
- shirin qalampir — 200 gr;
- piyoz — 180 gr;
- zira — 2 choy qoshiq;
- qalampir kukuni — 1 choy qoshiq;
- tomat pastasi — 40 gr;
- zaytun yog‘i — 50 ml;
- ta’bga ko‘ra tuz, murch va shakar.
- Un, xamirturush kukuni, 5 grammdan tuz va shakar, qaynagan suv va 25 ml yog‘ mikser yordamida aralashtiriladi. Aralashma xamir holiga keltirilib, yog‘langan idishga solinadi va usti yopilgan holda issiq joyga 40-60 daqiqaga qo‘yiladi.
- Tovada maydalangan piyoz seli chiqquncha zira bilan birga qovuriladi, so‘ng mayda bo‘laklangan qalampir va sarimsoq 2 daqiqa davomida, keyin qiyma 10-15 daqiqa qovuriladi. Ustidan tomat pastasi, murch, qalampir kukuni, tuz va shakar ta’bga ko‘ra solinib, 2-3 daqiqa qovuriladi. Olov o‘chirilgandan so‘ng maydalangan maydanoz (petrushka)ning yarmi solinadi.
- Tayyor bo‘lgan xamir yoyiladi va teng bo‘lakka bo‘linadi. Uzun qilib yoyilgan xamir maxsus pishiriq qog‘oziga joylashtiriladi. Qiymali aralashmaning bir qismi xamirning ustiga yoyiladi va xamirning chet qismidan 2-3 sm joy qoldiriladi. Xamirning cheti bukiladi va uzunchoq kema shakli hosil qilinadi. Xamir atrofi zaytun yog‘i bilan yog‘lanadi va 180 darajaga pechga qo‘yiladi. Pide usti qizargunga qadar 15-20 daqiqa davomida pishiriladi.
- Tayyor bo‘lgan pide ustiga maydanoz sepiladi va eniga bo‘laklanib, issiq holda dasturxonga tortiladi.
Izoh (0)