Қирғизистон чет элликлар ва фуқаролиги бўлмаган шахсларнинг мамлакатга киришини соддалаштирди. Бу ҳақда Қирғизистон ҳукумат матбуот хизмати хабар берди, деб ёзмоқда Asia Plus.
Маълум қилинишича, Қирғизистон Вазирлар Маҳкамаси 2020 йил 17 мартдаги хорижий давлатлар фуқаролари ва фуқаролиги бўлмаган шахсларнинг Қирғизистон ҳудудига киришига вақтинча чеклов киритиш тўғрисида буйруғига ўзгартириш киритди.
Киритилган ўзгартиришга мувофиқ, чеклов чоралари шароитида қуйидаги тоифадаги хорижий фуқаролар ва фуқаролиги бўлмаган шахслар Қирғизистонга кириши мумкин:
- Қирғизистон олий ўқув юртлари талабалари (ўқиш жойидан маълумотнома асосида);
- Қирғизистонда доимий яшаш ҳуқуқига эга бўлганлар;
- Қирғизистондаги тиббий муассасаларга даволаниш учун юборилганлар (ҳужжатлар асосида);
- яқин қариндошларнинг дафн маросимига бораётганлар (яқин қариндошлик алоқалари ва ўлим ҳолатларини ҳужжатлар билан тасдиқлаган ҳолда).
Эпидемиологик вазият барқарорлашишига қараб, Қирғизистон Соғлиқни сақлаш вазирлиги ҳар ойда икки марта — 1 ва 15-санада кўриб чиқиладиган тегишли мамлакатлар рўйхатини тасдиқлайди.
Ушбу давлатларнинг фуқаролари Қирғизистон қонунчилигида белгиланган тартибда Қирғизистон чегарасини кесиб ўтиши мумкин.
Ҳозирча Қирғизистон қуйидаги 31 та мамлакат фуқароларига мамлакатга киришга рухсат берди. Мазкур рўйхатга Ўзбекистон киритилмаган:
Россия, Грузия, Озарбайжон, Арманистон, Беларусь, Қозоғистон, Туркманистон, Бельгия, Австрия, Буюк Британия, Германия, Ирландия, Исландия, Италия, Латвия, Литва, Лихтенштейн, Люксембург, Португалия, Туркия, Швейцария, Швеция, Қатар, БАА, Хитой, Малайзия, Жанубий Корея, Покистон, Словения, Кувайт, Япония.
Жаҳон соғлиқни сақлаш ташкилоти ва Қирғизистон Ташқи ишлар вазирлигидан олинган маълумотларга асосланиб, давлатлар рўйхати Қирғизистон Соғлиқни сақлаш вазирлиги буйруғига биноан 2020 йил 20 августда қайта кўриб чиқилган.
Изоҳ (0)