Хитой пойтахти Пекин шаҳридаги Соғлиқни сақлаш органлари очиқ ҳавода аҳолининг мажбурий равишда тиббий ниқобда юриши тўғрисидаги тартибни бекор қилди. Бу ҳақда Reuters хабар берган.
Пекиндаги карантин чекловларни юмшатиш ҳақидаги қарорга мувофиқ одамларнинг кўчада ниқоб тақмасдан юришига рухсат берилди. Шаҳарда икки ҳафтадан буён COVID-19 юқтириб олиш билан боғлиқ янги ҳолатлар қайд этилмаяпти.
Янги қарорга қарамай мегаполисда яшовчи кўплаб фуқаролар хавфсизлик нуқтаи назаридан, шунингдек, ижтимоий босим сабаб тиббий ниқоб тақиб юришда давом этмоқда.
«Менимча, ниқобимни истаган вақтимда ечишим мумкин, лекин бу ишни қилишдан аввал бошқалар бунга қандай баҳо беришини ўйлашим керак. Шу сабабли одамлар кўпчиликни ниқобсиз кўриб қўрқиб кетиши мумкин деб ҳисоблайман», – дея мазкур қарорнинг қабул қилинганига изоҳ берган Пекинда яшовчи 24 ёшли аёл.
Апрель ойи охирида ҳам аҳолининг ниқобсиз юришига рухсат берилганди, аммо янги касалланиш ҳолатларининг кўпайиши июнга бориб яна қатъий карантин жорий қилинишига олиб келди. Агентликнинг аниқлик киритишича, Пекинда коронавирус бўйича икки ҳафталик сокинликдан кейин шаҳар аҳолиси одатий ҳаёт тарзига қайтган.
Хитойнинг материкли қисмида охирги беш кун ичида бирорта ҳам янги касалланиш ҳолати кузатилмаган ва пойтахтда, Шинжонда ва бошқа провинциялардаги беморлар касалликдан тузалди.
Экспертларнинг фикрича, мамлакатнинг касалликка қарши курашиб, ғалаба қозонишига қоидаларга қатъий риоя этиш, тиббий ниқоб тақиб юриш, уйда карантинда ўтириш ва оммавий равишда тест қилиш ишлари катта самара берган.Сўнгги маълумотларга кўра, Хитойда 20 август ҳолатига кўра жами 84 917 та касалланиш ҳолати қайд этилган, 22 нафар киши хориждан қайтганида уларда COVID-19 борлиги аниқланган.
Аввал хитойлик эпидемиолог Россияда ишлаб чиқилган COVID-19 коронавирус инфекциясига қарши вакцинага ижобий баҳо бериб, икки давлат олимлари бу борада ўзаро илмий ҳамкорлик қилаётганини қайд этган.
Изоҳ (0)