Жаҳон соғлиқни сақлаш ташкилоти бош директори Тедрос Адан Гебрейесус COVID-19 коронавирус пандемияси камида икки йил ичида ортда қолиши мумкинлигини айтиб ўтди. У бу ҳақда Женевада бўлиб ўтган брифингда маълум қилган.
ЖССТ раҳбари 1918 йилдаги испан гриппи пандемияси ҳам икки йил давом этганини эслатган. Унинг фикрича, COVID-19 коронавирус пандемияси дунёда одамлар ўртасидаги мулоқот кўпайгани туфайли тарихдаги энг кенг тарқалиб кетган вирус бўлишга яқин турибди.
«Лекин бизда пандемияни тўхтатиш учун технологиялар ва билим етарли», – деган ЖССТ бош директори.
Гебрейесус нутқи давомида инфекцияга қарши курашда халал бераётган жиҳат глобаллашув ва одамлар ўртасидаги мулоқотнинг фаоллашгани эканини таъкидлаган. У замонавий технологияларни пандемияга қарши курашдаги устунлик берувчи жиҳат деб ҳисобламоқда.
«Шу сабабли биз пандемияга яқин икки йил ичида барҳам берамиз, бунда барча кучларни бирлашган ҳолда сафарбар этиш, миллий бирлик ва глобал бирдамлик асосий қурол бўлади», – деган Тедрос Адан Гебрейесус.
У коронавирус инфекциясига қарши вакцина ишлаб чиқилишига умид қилиши ва касалликнинг тарқалишига қарши энг яхши чоралари кўрилиши лозимлигини билдирган.
COVID-19 коронавирус инфекцияси 2019 йил охирида Хитойнинг Ухань шаҳрида тарқала бошлаган, кейинчалик у ердан бошқа хориж давлатларига ўтган ва 2020 йил 11 март куни ЖССТ ушбу вируснинг тарқалишини бутун дунёда пандемия даражасига чиққанини эълон қилган.
Аввал 11 августда ЖССТ раҳбари коронавирусга қарши курашда «умид учқунлари» пайдо бўлганини маълум қилган, 19 август куни эса Тедрос Гебрейесус дунё мамлакатларини коронавирусга қарши вакцинани дунё бўйлаб тенг тарқатишга чақирган.
Изоҳ (0)