Тошкент шаҳар Сергели тумани 9-қурилиш ҳудудида 21 август, жума куни 1680 ўринга мўлжалланган 331-сонли мактабнинг тантанали очилиш маросими бўлиб ўтди. Ушбу мактаб очилишида халқ таълими вазири Шерзод Шерматов иштирок этди. Бу ҳақда Халқ таълими вазирлиги хабар берди.
Вазирлик томонидан таъкидланишича, бу сўнгги йилларда қурилган энг катта қувватга эга мактаблардан бири ҳисобланади. Мазкур мактабни қуриш жараёнида Президент мактаблари, Ал-Хоразмий, Мирзо Улуғбек номидаги ихтисослашган мактабларнинг қурилиш тажрибасидан фойдаланилди.
«Мактаб шинам ва сифатли мебеллар, ўқув ва лаборатория ускуналари, компьютерлар, зарур адабиётлар ва кўргазмали қуроллар билан тўлиқ таъминланган. Бу ерда ўқувчиларнинг замонавий талаблар даражасида билим олиши учун барча шароит яратилган», — дейилади вазирлик хабарида.
Тўрт қаватли мактабда 48 та синф хонаси, шу жумладан, 20 та фан хонаси, 14 та бошланғич синф хонаси ва 14 та чет тили хонаси, тўлиқ жиҳозланган компьютер хонаси, кимё, биология ва физика лабораториялари, шунингдек, қизлар ва ўғил болалар учун алоҳида жиҳозланган технология хоналари ҳамда электрон кутубхона мавжуд.
Халқ таълими вазирлиги томонидан мазкур мактабда таълим сифатини таъминлаш мақсадида Тошкентдаги энг талаб юқори бўлган мактаб директорлари орасида танлов ўтказилиб, номзодлар Кузатув кенгашлари томонидан танлаб олинган. Ўқитувчилар эса тест синовлари асосида ишга қабул қилинган. Тест синови натижасига кўра, энг юқори балл тўплаган 65 нафар педагог ишга қабул қилинган.
Қайд этилишича, туман аҳолиси учун янги ўқув жойлари ва шароитларни яратиш билан бир қаторда, ушбу мактаб ўқитувчилар ва бошқа соҳа ходимлари учун қўшимча иш ўринларини яратмоқда, уларнинг аксарияти ушбу ҳудуддаги янги қурилган кўп қаватли биноларда яшайди.
Вазирликнинг таъкидлашича, 2019 йилда Сергели туманида тўртта янги мактабнинг қурилиши бошланган эди. Ҳозирда уларнинг учтаси, яъни 329, 330, 331-сонли умумий ўрта таълим мактаблари фойдаланишга топширилди.
Аввалроқ давлат мактаб ҳамда мактабгача таълим муассасалари фаолиятини бошлаши юзасидан санитария-меъёр қоидалари ишлаб чиқилаётгани, шунингдек, 2020/2021-ўқув йили учун 1-синфга қабул режасининг 90 фоизи бажарилгани ҳақида хабарлар берилганди.
Изоҳ (0)