Бухоро вилояти божхона бошқармаси Коррупцияга қарши курашиш ва ўз хавфсизлик бўлими ҳамда Ташқи иқтисодий фаолиятда нотариф тартибга солишни назорат қилиш ва божхона экспертизаси гуруҳи ходимлари томонидан навбатдаги найранг фош этилди. Бу ҳақда Давлат божхона қўмитаси хабар бермоқда.
Маълум қилинишича, вилоятда фаолият олиб бораётган масъулияти чекланган жамиятлардан бирининг номига хорижий давлатдан олиб келинган Toyota Tundra Edition 1794 русумли автотранспорт воситаси ҳужжатларда енгил автомашина сифатида қайд этилган.
Бироқ ўрганилиш жараёнида маълум бўлишича, аслида автомашина пикап, яъни юк ташиш учун мўлжалланган автотранспорт воситаси эканлиги аниқланган.
«Уддабуронларнинг қинғир режаси фош бўлди ва давлат фойдасига 258,3 миллион сўм қўшимча божхона тўловлари ундириб олинди.
Ҳозирда юқоридаги ҳолат юзасидан божхона органлари томонидан суриштирув ҳаракатлари давом эттирилмоқда», — дейилади қўмита хабарида.
Изоҳ (0)