Бундан уч ой аввал «Kun.uz» сайтида Нуробод туманидаги «Омондара» паст босимли сув тўғонида ҳосил бўлган ёриқ – гирдобнинг аҳолига келтириши мумкин бўлган хавфи ҳақида мақола эълон қилинган. Нашрнинг хабар беришича, Самарқанд вилоят прокуратураси ушбу тўғон қурилишида қатнашган корхонанинг мансабдор шахсларига нисбатан жиноят иши қўзғатилгани ҳақида маълум қилган.
Маълум қилинишича, «Ўзмахсуссувқурилиш ихтисослашган компания» ДК (ҳозирги кунда «Ўзмахсуссувқурилиш» МЧЖ деб номланади) томонидан Нуробод туманида жойлашган «Омондара» паст босимли сув тўғони қурилишида камчиликларга йўл қўйилгани учун «Ўзмахсуссувқурилиш ихтисослашган компания» ДК мансабдор шахсларига нисбатан Жиноят кодексининг 167-моддаси 2-қисми «в» банди (бир гуруҳ шахслар томонидан олдиндан тил бириктириб ўзлаштириш ёки растрата йўли билан талон-торож қилиш) ҳамда 209-моддаси 1-қисми (мансаб сохтакорлиги) билан жиноят иши қўзғатилган.
Тергов ҳаракатлари давомида ушбу қурилишга алоқадор бўлган корхоналар мансабдор шахслари гувоҳ тариқасида сўроқ қилинган.
Ҳозирги кунда «Омондара» паст босимли сув тўғонида амалга оширилган қурилиш ишлари лойиҳа кўрсаткичларига мос келишини аниқлаш мақсадида назорат ўлчови ўтказилмоқда.
Мазкур жиноят иши юзасидан Самарқанд вилоят прокуратураси томонидан дастлабки тергов ҳаракатлари олиб борилмоқда. Тергов давомида айбдор шахслар доираси тўлиқ аниқланиб, қонуний қарор қабул қилиниши таъминланиши маълум қилинган.
Мавзуга доир:
- Сардоба сув омбори тўғони ўпирилиши иши бўйича тўққиз киши қамоққа олинган
- Сардоба сув омбори тўғонининг ўпирилиш сабаблари аниқланди
- Сардоба сув омбори қурилишининг 2-босқичи давлат комиссияси томонидан қабул қилинмаган, шунга қарамай у сув билан тўлиқ тўлдирилган
- Сирдарёда қайта тикланаётган уйларни таъмирлашда камчиликларга йўл қўйилаётганлиги аниқланди
Изоҳ (0)