Давлат тест маркази янги ўқув йили учун тест синовлари бўлиб ўтадиган стадион ва хиёбонлар рўйхатини эълон қилди. Унга кўра имтиҳонлар учун мамлакат бўйлаб умумий ҳисобда 40 та стадион ва хиёбон (65 та сектор) жалб этилади.
Кириш имтиҳонларини ўтказиш учун Навоий ва Сирдарё вилоятларида 2 та ҳудуд, Бухоро, Хоразм ва Жиззах вилоятларида 3 тадан, Қорақалпоғистон, Сурхондарё Қашқадарё ва Наманган вилоятларида 4 тадан, Андижон ва Фарғона вилоятларида 6 тадан, Самарқанд вилоятида эса 7 та ҳудуд жиҳозланади.
Тошкентда кириш имтиҳонлари 17 та жойда ўтказилади. Уларнинг 3 таси «Пахтакор» стадиони ҳудудида, 4 таси Миллий боғда, 2 таси Талабалар шаҳарчаси (Ўзбекистон Миллий университети)даги хиёбонда, 5 таси «Ашхобод» боғида, 1 таси Ғалаба боғи ва 2 таси Ботаника боғида бўлиб ўтади.
2020/2021-ўқув йили қабулида ОТМнинг бакалавриат таълим йўналишлари учун тест синовлари ўтказиладиган стадионлар ва хиёбонларнинг тўлиқ рўйхати билан ушбу ҳавола орқали танишиш мумкин.
Эслатиб ўтамиз, 91 та олий таълим муассасаси ва филиалларда таълимнинг бакалавриат йўналишига қабул қилиш бўйича тест синовлари 2020 йил 2 сентябрдан бошланади ва 12 кун давом этади. Ҳар куни 2 босқичда ташкил этилади. Синовлар ўтказиладиган жойларнинг барчаси видеокузатув камералар билан жиҳозланади. Абитуриентларга антисептик воситалар, қўлқоп, ниқоб, бош кийим бепул берилади.
Хавфсизликни таъминлашга Ички ишлар вазирлиги, Миллий гвардия, Фавқулодда вазиятлар ва Соғлиқни сақлаш вазирлиги ходимлари, турғун ва қўлда олиб юрувчи металлодетекторлар, транспорт ва алоқа воситалари ҳамда хизмат итлари жалб этилади. Фавқулодда ҳолатларнинг олдини олиш мақсадида ҳар бир кучишлатар тизимида хизматга жалб этиш учун захира кучлари шакллантирилади.
Изоҳ (0)