Наманган шаҳрининг марказий кўчаларидан ҳайдовчи ва пиёдаларни ҳушёрликка чорловчи тарғибот автокарвони айланди. Бу ҳақда «Дарё» мухбири Азизбек Абдувалиев хабар бермоқда.
Эвакуаторларга ЙТҲлар оқибатида шикастланган енгил автомобиллар ортилди. Уларнинг олд томонига «Ҳайдовчи, унутманг, сизни оилангиз кутмоқда», «Аттанг қилманг, амал қилинг!» мазмунидаги баннерлар ўрнатилди.
Автокарвон давомида овоз кучайтиргичлар ёрдамида йўл қоидаларига риоя этиш, тезликни оширмаслик, болаларга ҳушёр бўлишга даъват этилган матнлар ўқиб эшиттирилди, буклетлар тарқатилди.
Қайд этиш жоизки, Наманганда йўл ҳаракати хавфсизлиги билан боғлиқ вазият жиддий тус олмоқда. 2020 йилнинг 7 ойи мобайнида вилоятда 390 та ЙТҲ рўй берди. Уларда 87 киши ҳалок бўлди, 274 киши жароҳатланди.
Қурбонларнинг 20, яраланганларнинг эса 40 нафари вояга етмаганларга тўғри келди.
Изоҳ (0)